“Tarixi təhrif etməyə çalışan siyasi fırıldaqçılar yenidən səhnədədir”.

Sfera.az bildirir ki, bunu Türkiyənin Xarici işlər naziri Mövlud Çavuşoğlu ABŞ prezidenti Co Baydenin 1915-ci il hadisələri ilə bağlı açıqlamalarına münasibət bildirərkən deyib.

O, fikirlərini bu cür davam etdirib: “Tarixi siyasi bəyanatlarla yenidən yazmaq olmaz. Bu münasibətdə israrlı olan fürsətçilər gizli niyyətləri və ikiüzlülükləri ilə yadda qalacaqlar. Böyük Türk Millətinə tarix dərsi vermək heç kimin həddinə deyil”.

Türkiyə Xarici İşlər Nazirliyi də bəzi ölkələrin dövlət rəsmilərinin səsləndirdiyi fikirlərlə bağlı açıqlama verib. Qeyd olunub ki, 1915-ci il hadisələri ilə bağlı reallığa və beynəlxalq hüquqa uyğun gəlməyən, təəssüf doğuran bəyanatlar tarixi siyasi motivlərlə yenidən yazmağa yönəlmiş əbəs cəhdlərdir: “Heç kəs unutmamalıdır ki, 1915-ci il hadisələri siyasətçilərin öz planlarına və daxili siyasi mülahizələrinə görə müəyyən edilə bilməz. Belə yanaşma yalnız tarixin saxtalaşdırılmasına gətirib çıxarır. Bu qərəzli mövqedə israr edənlər tarixdə ucuz siyasi fürsətçi kimi xatırlanacaqlar. Bizim üçün etibarsız olan bu açıqlamaları rədd edir və bu yanlışda israr edənləri ən sərt şəkildə qınayırıq. Heç kim və heç bir qurum Türkiyəyə öz tarixini öyrədə bilməz”.

Qeyd edək ki, ABŞ Prezidenti Co Bayden 24 aprel 1915 hadisələrinin ildönümü ilə bağlı açıqlamasında "soyqırım" ifadəsini işlədib.

Türkan