Xəbər verdiyimiz kimi Laçın-Xankəndi yolunun başlanğıcında sərhəd-buraxılış məntəqəsi qurulub. Bu, 2020-ci il 10 noyabr tarixli üçtərəfli Bəyanata zidd olaraq Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısının alınması məqsədilə və Ermənistan tərəfindən aprelin 22-də birtərəfli qaydada Azərbaycanla sərhəddə, Laçın-Xankəndi yolunun girişində nəzarət buraxılış məntəqəsinin qurulmasına cavabdır.

Növbəti addımlar nələr ola bilər?

Bununla bağlı Sfera.az-a açıqlama verən siyasi şərhçi Kənan Novruzov deyib ki, sözügedən postun qurulması çoxdan gözlənilirdi:

“Təcrübə göstərir ki, qarşı tərəf xəbərdarlıqlardan dərs çıxarmaq istəmir. Həmçinin ərazidə təhlükəsizliyin təmin olunmasına görə məsuliyyət daşıyan rus sülhməramlıları da ermənilərə “gözün üstündə qaşın var” demək istəmirlər. Bu mənada sərhəd-buraxılış məntəqəsinin yaradılması xüsusi əhəmiyyətə malikdir. Beləliklə, biz haqlı olaraq separatçılarının “nəfəsliyini” bağladıq. Bundan sonra qanunsuz əməllər xeyli məhdudlaşacaq. Gələcəkdə ərazidə digər dövlət qurumlarının, o cümlədən post-patrul xidmətinin də postları qurula bilər. O cümlədən, ermənilər və Qarabağdakı separatçılar məntəqənin qurulmasına "cavab olaraq" təxribatlarını intensivləşdirə bilərlər”.

Müsahibimiz bildirib ki, bundan sonra ekofəalların aksiyasına ehtiyac qalmayacaq:

“Ehtimal edilən təxribatlarla bağlı yeni gərginliyin yaranması, o cümlədən anti-terror əməliyyatının başlanması mümkündür. Nəzarət-buraxılış məntəqəsinin yaradılması rəsmi Bakının növbəti və kifayət qədər ciddi uğurudur. Bu, təkcə Ermənistana yox, eləcə də digər regional aktorlara Qarabağın Azərbaycanın suverenliyi daxilində olduğuna, oradakı bütün proseslərin bizim daxili işimiz olduğuna dair mesajdır. Hər kəs bilməlidir ki, Qarabağın təhlükəsizliyi bizi birbaşa maraqlandırır və Azərbaycan lazımi tədbirlərə görməyə hazırdır.  Həm İrəvən, həm də onu təhrik edənlər  bu nəticədən və verilən ismarışdan dərs çıxarmalıdırlar. Əks halda növbəti addımlar daha kəskin ola bilər”.

Günay Rəsulqızı