Bolqarıstan Ukraynadan taxıl, süd və süd məhsulları, ət və şərab da daxil olmaqla 20 kənd təsərrüfatı məhsulunun idxalını müvəqqəti olaraq qadağan edib.

Sfera.az xəbər verir ki, Polşa, Macarıstan və Slovakiyadan sonra Bolqarıstan da bəzi kənd təsərrüfatı və ərzaq məhsullarının Ukraynadan idxalına qadağa qoyub.

Bolqarıstanın Baş naziri vəzifəsini icra edən Qalab Donev mətbuata açıqlamasında Avropa Birliyinin həmrəylik dəhlizləri ideyasına baxmayaraq, ötən il Ukraynadan idxal edilən kənd təsərrüfatı və ərzaq məhsullarının əhəmiyyətli hissəsinin Bolqarıstanda qaldığını və bu vəziyyətin əsas istehsal və ticarət şəbəkələrində qeyri-sabitliyə səbəb olduğunu bildirib. 

Nazir qeyd edib ki, bu vəziyyət əsas istehsal və ticarət şəbəkələrində qeyri-sabitliyə səbəb olduğundan belə qərar qəbul ediblər.

Ukrayna ilə həmrəy olduqlarını bildirən Donev, "Bolqarıstan vətəndaşlarının problemlərini həll etməyə çalışan bir hökumət buna icazə verə bilməz" , - deyib.

Aprelin 24-dən qüvvəyə minəcək qadağa ilə taxıl, süd və süd məhsulları, qırmızı ət, bal, quş əti və məhsulları, şərab və sirkə daxil olmaqla 20-yə yaxın məhsulun idxalına qadağa qoyulub. İyunun 30-dək qüvvədə olacaq qadağa, sözügedən məhsulların Bolqarıstan ərazisindən tranzitini əhatə etmir.

Bolqarıstanın Kənd Təsərrüfatı Naziri Jawor Geczew ölkədəki taxıl istehsalçılarının çətin vəziyyətdə olduğunu, satılmamış məhsullarla dolu anbarlarda yeni məhsula yer olmadığını və yalnız bu istehsalçıların itkilərinin 1 milyard avro təşkil etdiyini bildirib.

Xatırladaq ki, Avropa İttifaqı ölkələrindən olan Polşa, Macarıstan və Slovakiya bu yaxınlarda iyunun 30-dək Ukraynadan kənd təsərrüfatı və ərzaq məhsullarının gətirilməsinə qadağa qoyub. Polşa və Macarıstan öz fermerlərini qorumaq üçün belə bir qərar qəbul etdiklərini açıqlasalar da, Slovakiya Ukraynadan gətirilən taxılın laboratoriyalarda yoxlanılmasından sonra, standartlardan yüksək pestisidlər aşkar edildikdən sonra qadağa qərarı alıb. 

Lalə

Sfera.az