İqtisadi böhran içində olan və yerli valyutanın dollar qarşısında record həddə dəyər itirdiyi Livanda hökumət dövlət qulluqçularının maaşlarını təxminən 4 dəfə artırıb. 

Sfera.az xarici mətbuata istinadən xəbər verir ki, ən aşağı məmur maaşı 27 dollardan 90 dollara qaldırılıb.

Livanın baş naziri Nəcib Mikatinin iştirakı ilə paytaxt Beyrutdakı Hökumət Sarayında iclas keçirilib.

Görüşdən sonra Livanın informasiya naziri Ziyad Makari kameralar qarşısına keçərək hökumətin dövlət qulluqçularının maaşlarının yaxşılaşdırılması ilə bağlı qərarını izah edib.

Mekari məmurların ən aşağı maaşının 2 milyon 600 min Livan funtundan (27 dollar) 9 milyon Livan funtuna (90 dollar) yüksəldildiyini açıqlayıb. Mayın 1-dən etibarən yeni maaşların verilməyə başlayacağını deyən Mekari ən aşağı pensiyanın 7 milyon funta (72 dollar) yüksəldildiyini qeyd edib.

Mekari yanacaq qiymətlərindəki yüksək artım səbəbiylə yol tarifində bəzi düzəlişlər edildiyini və məmurlara gündəlik 450 min Livan funtu (5 dollar) yol haqqı ödəniləcəyini bildirib.

Qeyd edək ki, təqaüddə olan əsgərlər və dövlət qulluqçuları maaşlarını artırmaq üçün mart ayından Hökumət Sarayının qarşısında nümayişlər keçirirlər.
2019-cu ilin oktyabrında Livanda başlayan nümayişlər, hökumətin istefası, Beyrutdakı liman partlayışı və Kovid-19 epidemiyası kimi hadisələr ölkə iqtisadiyyatına dərindən təsir edib.

Təxminən 3,5 ildir davam edən iqtisadi böhran şəraitində valyuta ehtiyatlarının əriməsinin qarşısını almaq üçün banklardakı dollar depozit hesabları dondurulub.
Ölkədə 2019-cu ildə 1 ABŞ dolları 1500 Livan funtu olub, 2022-ci ilin yanvar ayında 1 ABŞ dolları 20 min Livan funtuna qədər qalxıb. Son 1 ildə ölkə valyutasının sürətlə ucuzlaması davam edib. Əhalinin 80 faizinin yoxsulluq həddində olduğu bildirilən Livanda martın 14-də qara bazarda 100 min Livan funtu səviyyəsində satılan dollar, martda 140 min Livan funtu çataraq yeni rekord qırıb. Hazırda qara bazarda 97 min livraya satılır. 

Böhrandan əvvəl Livanda bir dövlət qulluqçusu min dollar maaş alırdısa, hazırda həmin maaş 90 faiz “əriyərək” 100 dollardan aşağı düşüb.

Lalə
Sfera.az