“Ukrayna Silahlı Qüvvələrinin gözlənilən əks-hücumu uğurlu olacaq”.

Sfera.az bildirir ki, bunu ABŞ ordusunun istefada olan generalı Devid Petreus deyib. O, əks-hücumda ukraynalıların iki məqsədinin olduğunu vurğulayıb:

“Birincisi, Krımla Ukraynanın şərqi arasında Rusiya tərəfindən işğal olunmuş quru körpüsünü kəsmək; ikincisi, Ukraynanın cənubunda rus qüvvələrinin məhv edilməsi və onların hazırda işğal olunmuş ərazilərin çox hissəsindən geri çəkilməsi. Yaz-yay hücumunda biz hazırda Almaniya, Polşa, Böyük Britaniya və Ukraynada təlim keçən yeni qüvvələri görəcəyik. Məncə, onlar öz məqsədlərinə çatacaqlar”.

Petreus qeyd edib ki,  Kiyev ilk dəfə olaraq hücum zamanı piyadalardan əlavə, tank və artilleriyadan istifadə etmək niyyətindədir: “Müttəfiqlər tərəfindən onlara hədiyyə edilən MiQ-29 reaktiv qırıcıları Ukrayna tanklarının hava mühafizəsini təmin etmək üçün əhəmiyyətli olacaq”.

Rusiyanın savaşdakı səhvlərindən danışan sabiq general onun Ukrayna ordusunu düzgün qiymətləndirmədiyini və öz gücünü şişirtdiyini söyləyib:

“Rus ordusu öyrənə bilmir, onlar heç bir şəkildə öz səhvlərini dərk etmirlər. Mən İraq və Əfqanıstanda ABŞ qüvvələrinə komandanlıq edərkən biz qarşımızda məqsəd qoymuşduq ki, öyrənən bir təşkilat olacağıq. Lakin ruslardan fərqli olaraq, ukraynalılar inkişaf edir və daha da yaxşılaşır. Ona görə də deyə bilərəm ki, onlar rusların bacarmadığı şeyi edəcəklər - genişmiqyaslı hərbi əməliyyat keçirəcəklər”.

Günay Rəsulqızı