Ötən həftənin şənbə günü Sudanda baş vermiş silahlı qarşıdurma hələ də davam edir.

Sfera.az xəbər verir ki, ölkənin paytaxtı Xartum və bəzi digər şəhərlərdə ordu ilə Çevik Reaksiya Qüvvələri adlanan silahlı birləşmələr arasında qarşıdurma güclənib. Qanlı qarşıdurmadan artıq 5 gün ötür.

Beynəlxalq təşkilatların hərbi qarşıdurmaya son qoymaq üçün tərəflərlə apardığı danışıqlar lazımı nəticələr vermir, əldə edilən atəşkəz razılaşmaları qısa müddətdən sonra pozulur.

Sudan hökuməti, ordusu qarşıdurmanın vətəndaş müharibəsinə çevrilmək təhlükəsindən ehtiyatlanır. Çünki döyüşlər uzandıqca paytaxt Xartumda dağıntılar artır, insan tələfatı çoxalır.

Ordu Xartuma daha çox tank və zirehli texnika yerləşdirir, döyüşün həlledici mərhələyə daxil olduğu bildirilir.

Hazırda Sudan ordusuna Misir, Çevik Reaksiya Qüvvələrinə Birləşmiş Ərəb Əmirliyi (BƏƏ) dəstək verir.

Xatırladaq ki, Sudan ordusu və Çevik Reaksiya Qüvvələri 2021-ci ildə dövlət çevrilişi həyata keçirərək siyasi hakimiyyəti ələ keçiriblər. Böyük Britaniya, ABŞ, Səudiyyə Ərəbistanı və BƏƏ hazırda hakimiyyətin yenidən mülki şəxslərə qaytarılmasına səy göstərir.

BMT-nin Sudandakı nümayəndəsi Volker Pertez bildirib ki, döyüşlər başlayandan bəri ən azı 185 nəfər ölüb, 1800-dən çox adam yaralanıb. Paytaxtın bəzi hissələri döyüşlər nəticəsində ciddi ziyan görüb.

Vasif