Ötən gün Paşinyan parlamentdə çıxışı zamanı Azərbaycanın ərazi bütövlüyünü tam olaraq tanıdıqlarını deyib.

“Ermənistan və Azərbaycan arasında sülh sazişi o zaman real olacaq ki, hər iki ölkə bir-birinin ərazi bütövlüyünü birmənalı şəkildə, qeyri-müəyyənlik və hiylə olmadan tanısın və əbədi olaraq bir-birinə ərazi iddiası irəli sürməyəcəyinə söz versin”, – deyə Paşinyan bildirib.

Bununla bağlı Sfera.az-a açıqlama verən politoloq  Zaur Məmmədov deyib ki, Nikolun dünənki bəyanatı ikibaşlıdır:

“Onun “Azərbaycan SSR-nin sərhədlərini tanıyırıq” deməsi hüquqi cəhətdən Qarabağı da qonşu dövlətin ərazisi kimi qəbul etməsi formasında başa düşülməlidir. Lakin məlumdur ki, Ermənistanda tez-tez 1988- ci il Dağlıq Qarabağ Muxtar Vilayətinin qondarma qərarına istinad edilir. İndi bu açıqlaması ilə Nikol vaxtı uzadaraq imitasiya edir, yoxsa daxili reaksiyanı yoxlayır və ya Qarabağı Azərbaycanın ərazisi kimi tanımağa hazırdır?  O da faktdır ki, regional güclər sülh müqaviləsinin imzalanmasına asanlıqla imkan verməyəcəklər. Nikolun komandası da məsuliyyəti üzərinə götürmək istəmir. Qalır bircə adam - o da Paşinyanın özüdür”.

Ekspert qeyd edib ki, rəsmi Bakı və İrəvanın məsələyə münasibətdə üst-üstə düşən və düşməyən məqamlar var:

“Sülh müqaviləsi ilə bağlı sənədin üzərində iş davam edir. Ən prinsipial məsələ isə Qarabağla bağlıdır. “Qarabağ” ifadəsi sənəddə olmasa da, “Azərbaycanın Qarabağ da daxil olmaqla, ərazi bütövlüyünü tanıyıram” ifadəsi üzərində Ermənistanın imzası olmalıdır. Hər halda, Paşinyanın əlinə tarixi şans düşüb. Vaxtilə Ter Petrosyan da Qarabağla bağlı açıqlama verəndə onu xəyanətdə günahlandırırdılar. İndi isə bu sözləri Paşinyan deyir və ona bu gün qulaq asmayanlar sabah başlarını döyə-döyə qalacaqlar”.

Günay Rəsulqızı