Rusiya prezidenti Vladimir Putin “Dnepr” qoşun qrupunun Xerson istiqamətində yerləşən qərargahına baş çəkib, hərbçilərlə görüş keçirib. Sözügedən səfər artıq dünya mediasının əsas müzakirə mövzularındandır.

Mövzu ilə bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, bu, son ayyarım ərzində Vladimir Putinin ikinci belə səfəridir:

“Putin Rusiyanın Ukraynadakı işğal etdiyi ərazilərə bundan əvvəl də səfər etmişdi. Krıma isə mütəmadi olaraq gedir. Düşünürəm ki, Putin xüsusən də Ukraynanın əks-hücuma başlamaq istədiyi bir vaxtda “Mən burada möhkəmlənmişəm”, mesajını verməyə çalışır. Amma bu, təkcə Ukraynaya deyil, həm də Qərbə ünvanlanan mesajdır. Düzdür, Ukraynanın əks-hücum planları ilə bağlı məlumatlar var, amma bunun nə zaman olacağını hələ heç kim dəqiq bilmir. Güman ki, bir müddət çəkəcək. Rusiyanın belə bir addım atması həm də “hələ güclüyəm və burada qalacam”, mesajıdır”.

Müsahibimiz deyib ki, Rusiyanın mesajlarına rəğmən, nəticə məlumdur:

“Onların Qərblə bu prosesi təkbaşına nə qədər davam etdirəcəyi məlumdur. Yəni çox davam etməyəcək. Burada həm iqtisadi sanksiyalar, həm dünyadan təcrid olunma prosesləri önəmlidir. Fikrimcə, Putinin səfəri birbaşa güc göstərisidir. Bu isə Rusiya cəmiyyətinə və ordusuna hesablanıb. Hər halda hadisələrin gedişatı bundan sonra nə olacağını göstərəcək”.

Günay Rəsulqızı