Orucluq bitdikdən sonra necə qidalanmaq lazımdır? – Məsləhətlər

Məlum olduğu kimi, Ramazan ayı boyunca oruc olan şəxslər gün ərzində normal qidalanma rejimindən uzaq düşür.

Bir ay ərzində saatlarla davam edən aclıq və susuzluq sonradan müəyyən qidalanma vərdişləri də yarada bilir. Belə şəxslərin orucluq bitdikdən sonra sağlamlıq üçün hansı şəkildə qidalanmalı olduğu isə maraq doğuran məsələlərdəndir.

Mövzu ilə bağlı Sfera.az-a açıqlama verən sağlam qidalanma üzrə mütəxəssis Məhsəti Hüseynova orucu açdıqdan sonra gəzməyin daha uyğun olduğunu bildirib:

“Orqanizmin birdən-birə saat dəyişikliyinə öyrənməsi üçün axşam yeməklərini 3-4 gün ərzində yarım saat fərqlə qəbul etmək lazımdır. Bu günlər ərzində yatmazdan 4-5 saat əvvələdək axşam yeməyini yemək olar. Ramazan zamanı insanlar uzun müddət ac qaldığı üçün xəmirli, paxlalı qidalar qəbul edirdisə, orucluq sonrası bu qidaları azaltmaq lazımdır. Gün ərzində, xüsusilə axşam saatlarında tərəvəzli qidalara daha çox yer vermək lazımdır ki, lifli qidalar bağırsaqların işləməsini təmin etsin. Eyni zamanda mütləq şəkildə səhər yeməyi yeyilməlidir. Axşam yeməyindən sonra yürüş etmək maddələr mübadiləsi üçün xeyirli olar”.

Mütəxəssis orucluq bitdikdən sonra su qəbulunun da önəmli olduğunu diqqətə çatdırıb:

“Ramazan ayında susuzluqdan əziyyət çəkməmək üçün insanlar yağlı qidalardan, turşulardan çox istifadə edə bilmir. Orucluq sonrası dərhal həmin qidaları qəbul edən şəxslərdə həzm sistemində problemlər yarana bildiyi üçün bu qidaları tezliklə qəbul etməmək lazımdır. Digər əsas məsələlərdən biri meyvə-tərəvəz qəbul etməkdir. Gün ərzində maye qəbul etməyə də diqqət yetirmək lazımdır. Maye qəbulu artıq çəkisi olmayan insanlarda hər kq üçün 30 ml təşkil etməlidir. Bu miqdarı 1-2 fincan artırmaq olar. Bu şəkildə qidalanma orucluq sonrası sağlamlığın bərpasına faydalı ola bilər və artıq çəki alınmasının qarşısını alacaq”.

Əzizə Zeynal