Putin həm qorxur, həm də buna məcburdur – Növbəti səfərbərlik olacaqmı?

Britaniyanın “Sky news” nəşrinin məlumatına görə, Rusiya Ukraynanın ehtimal edilən əks-hücum əməliyyatına hazırlaşır. Bildirilib ki, Rusiyada hərbi çağırışçılarla bağlı qəbul olunan yeni qanundakı məhdudlaşdırıcı qərarlar da bununla bağlıdır:

“Rusiya hakimiyyəti növbəti səfərbərliyi planlaşdırmadığını bildirir. Kreml sözçüsü Dmitri Peskovun sözlərinə görə, qəbul edilmiş yeni qanun sadəcə, hərbi çağırış sistemindəki qarışıqlığı aradan qaldırmaq üçündür”.

Vurğulanıb ki, Peskovun açıqlamasına rəğmən, gələcəkdə Rusiyada növbəti səfərbərliyin elan olunması mümkündür.

Bununla bağlı Sfera.az-a açıqlama verən siyasi şərhçi Kənan Novruzov xatırladıb ki,  bu günlərdə Rusiyada qəbul olunmuş yeni qanuna görə, hərbi çağırışdan yayınan şəxslərin avtomobil idarə etmək hüququ məhdudlaşdırılıb:

“Eyni zamanda onlar ölkədən çıxa və mənzillərini sata bilmirlər. Sözügedən qanun mahiyyət etibarı ilə çağışçılara təzyiq göstərmək deməkdir. Bu isə hakimiyyətin yeni döyüşçülərə ehtiyacı olduğunu göstərir. Son vaxtlar Ukraynanın ehtimal edilən əks-hücum əməliyyatları gündəmdədir. Ukrayna rəsmiləri, o cümlədən Prezident Volodimir Zelenski və müdafiə naziri Oliksiy Reznikov müdafiə qüvvələrinin yaxın vaxtlarda əks-hücum əməliyyatına başlayacağını bildiriblər. Mətbuatda yazıldığına görə, əks-hücum əməliyyatları zamanı ABŞ da Ukraynanı dəstəkləyəcək. Ukrayna Baş naziri Denis Şmıqal bu günlərdə bildirmişdi ki, əks-hücum əməliyyatları nəticəsində 1991-ci il sərhədləri bərpa oluna bilər. Həmçinin rəsmi Kiyev müharibənin bu il başa çata biləcəyini iddia edir. Bu məqamlar Rusiya hərbi-siyasi elitasında təlaş yaradır”.

Müsahibimiz Rusiyanın əks-hücum əməliyyatlarına hazırlaşdığını qeyd edib:

“Kreml bu hazırlığı mümkün qədər gizli aparmağa, özünü soyuqqanlı göstərməyə çalışır. Rusiyada birdən-birə növbəti səfərbərlik elan oluna bilməz. Bu, daxildə ciddi narazılığa səbəb olar. Odur ki, rəsmi Moskva mümkün qədər ehtiyatlı davranmağa çalışır. Çağırışçılar haqqında qəbul olunan yeni qanun onu deməyə əsas verir ki, hərbi sistemdə müəyyən boşluqlar var. Həmçinin ola bilsin, döyüşçülər arasında narazılıq, o cümlədən fərarilik artıb. Ona görə də hakimiyyət onlara təzyiq üçün bu cür məhdudlaşdırıcı qərarlar qəbul edib. Səfərbərliyin növbəti dalğasının elan olunması Rusiya hakimiyyəti üçün riskli qərar olar. Hakimiyyətin asanlıqla bu addımı atacağını düşünmürəm. Rusiyanı nəinki xaricdən, həm də daxildən artan təhlükələr gözləyir. Belə gedərsə, gələcəkdə hərbçilərin narazılığının artması da mümkündür”.

Günay Rəsulqızı