Çinin müdafiə naziri Li Şanfu aprelin 16-da Rusiyaya səfər edəcək. Aprelin 19-dək davam edəcək səfərdə Li Şanfu bir sıra rəsmi şəxslərlə, o cümlədən həmkarı Sergey Şoyqu ilə görüşəcək.

Bununla bağlı Sfera.az-a açıqlama verən siyasi şərhçi Kənan Novruzov deyib ki, Çin və Rusiya müdafiə nazirləri görüş zamanı Ukraynadakı durumu müzakirə edəcəklər:

“Bundan başqa, onların təhlükəsizlik və müdafiə sahəsindəki əməkdaşlığın gücləndirilməsinə dair fikir mübadiləsi aparmaları mümkündür. Qərb son vaxtlar hər iki dövlətə təzyiq göstərir. Belə bir vaxtda ümumi təhlükəyə qarşı səyləri birləşdirmək ən optimal yoldur. Nazirlər  həmçinin, nüvə silahının tətbiqi və nüvə təhlükəsizliyi barədə danışa bilərlər. Rusiyalı rəsmilər, o cümlədən Prezident Vladimir Putin dəfələrlə bildirib ki, rəsmi Moskva öz təhlükəsizliyi naminə nüvə silahından istifadə edir. Amma Kremlin bu məsələdə tərəddüdlü olduğu aşkardır”.

Müsahibimiz qeyd edib ki, nüvə silahının tətbiqi Pekinin maraqlarına uyğun deyil:

“Bu mənada tərəflərin bu barədə də danışması istisna deyil.  Çox güman, nazirlərin müzakirə etdiyi bir çox məsələ ictimaiyyətə açıqlanmayacaq. Gələcəkdə Çinlə Rusiya arasında hərbi əməkdaşlığın daha da güclənməsi mümkündür. Sözsüz ki, Qərblə hər iki dövlət arasında gərginliyin artması ilə müşayət olunacaq”.

Günay Rəsulqızı