Bu ilin fevralında Türkiyənin əməliyyatlar balansında böyük kəsir qeydə alınıb. 

Sfera.az xəbər verir ki, aylıq kəsirin məbləği 8,78 milyard dollar, birillik kəsirin məbləği isə 55,4 milyard dollar olub. 

Müqayisə göstərir ki, bu ilin fevralında qeydə alınan kəsir 2012-ci ilin avqustundan bəri qeydə alınan ən böyük kəsirdir.

Cari əməliyyatlara ölkənin xarici ticarəti (idxal-ixrac),  əldə edilən və göstərilən xidmətlər, əldə edilən və ödənilən ilkin gəlirlər (əmək haqqı, dividend, faiz, renta və digər bu tip ödənişlər) və təkrar gəlirlər (pul baratları, humanitar yardımlar, qrantlar və s.) aiddir. Hər bir ölkədə cari əməliyyatların vəziyyəti milli valyutanın kursuna təsir göstərən əsas göstərici hesab edilir. Məsələn, Azərbaycan manatının məzənnəsinin sabit olmasının əsas səbəbi ölkəmizin cari əməliyyatlarında müsbət fərqin olmasıdır. 2015-ci ildə 2 böyük devalvasiyanın olmasının səbəbi məhz cari əməliyyatlarda yaranan kəsirlə bağlı oldu. 

Türkiyədə də cari əməliyyatlarda böyük kəsirin yaranması lirəni ucuzlaşdırır. İlin əvvəlində bir dollar 18,8 lirə olduğu halda, hazırda 19,26-dır. Qısa müddətdə lirənin nəzərəçarpacaq dərəcədə ucuzlaşmasının səbəbi məhz cari əməliyyatlar zamanı böyük kəsirin yaranmasıdır. 

Vasif