ÜST-dən sonsuzluqla bağlı HESABAT - Hansı ölkələrdə vəziyyət daha kritikdir?
Ümumdünya Səhiyyə Təşkilatı (ÜST) bildirib ki, dünyada hər 6 yetkin insandan 1-i sonsuzluq problemi ilə üzləşir.
Sfera.az xəbər verir ki, ÜST-ün dərc etdiyi hesabata görə, dünyada bir çox insan həyatı boyu sonsuzluq problemi yaşayır.
Bildirilir ki, yetkin əhalinin 17,5 faizi sonsuzluqdan əziyyət çəkir, bu isə münasib qiymətə, yüksək keyfiyyətli sağlamlıq xidmətinə çıxış imkanlarının artırılmasına təcili ehtiyac olduğunu göstərir:
“Sonsuzluq qlobal sağlamlıq problemi kimi önə çıxır. Sonsuzluq səviyyəsi yüksək gəlirli ölkələrdə 17,8 faiz, orta və aşağı gəlirli ölkələrdə isə 16,5 faiz təşkil edir”, - deyə ÜST bildirir.
Qurumun hesabatında qeyd olunur ki, xəstəliyin diaqnostikası və müalicəsi ilə bağlı həll yolları, o cümlədən süni mayalanma və sonsuzluq üçün digər reproduktiv texnologiyalar üçün kifayət qədər maliyyə olmadığı görünür. Bir çox insan yüksək xərclər və sosial stiqma səbəbindən müalicə ala bilmir.
Məlumata görə, bir çox ölkədə insanlar sonsuzluqla bağlı müalicələri əsasən özləri maliyyələşdirirlər. Aşağı gəlirli ölkələrdə olanlar yüksək gəlirli ölkələrlə müqayisədə gəlirlərinin daha çox hissəsini bu problemə xərcləyirlər.
Həmçinin bildirilir ki, sonsuzluq insanların psixi və psixososial rifahına təsir göstərir.
Hesabatda fikirləri yer alan ÜST-ün baş direktoru Tedros Adanom Qebreyesus sonsuzluğun ayrı-seçkilik olmadan hər kəsə təsir etdiyini bildirib: "Sonsuzluqdan təsirlənənlərin nisbəti onu göstərir ki, bununla bağlı sağlamlıq xidmətlərinə çıxış imkanları genişləndirilməli və bu məsələ artıq səhiyyə sahəsindəki araşdırmalardan və siyasətdən kənarda qalmamalıdır”.
Lalə
Sfera.az