Pullarını çoxaldacağını vəd etdiyi 12 nəfəri öldürdü, evinin bağçasında basdırdı – Şamandan inanılmaz əməl
İndoneziyanın Mərkəzi Yava əyalətinin Banjarneqara şəhərində 45 yaşlı şaman Slamet Tohari qətl törətməkdə ittiham olunaraq saxlanılıb.
Sfera.az xarici mətbuata istinadən bildirir ki, şamanın pullarını çoxaldacağını vəd edərək aldatdığı insanları öldürdüyü üzə çıxıb.
Evinin bağçasında 12 nəfərin cəsədi tapılan Tohari əməllərini etiraf edib.
Polisin açıqlamasına görə, şaman aldatdığı insanlar pulu geri istədikdə onları zəhərləyib.
Toharinin törətdiyi qətllər, öldürdüyü şəxsin oğlunun polisə xəbər verməsi ilə üzə çıxıb. Sonuncu dəfə həmin şəxsdən martın 24-də xəbər alınıb. O, oğluna mesaj yazaraq harada olduğunu deyib və evə qayıtmayacağı təqdirdə polisə məlumat verməsini istəyib.
Şikayət səbəbilə polis şamanın evinə basqın edib və ərazidə çoxlu qəbirlərin olduğu müəyyən edilib. Bəzi məzarlarda 2-3 nəfərin cəsədi tapılıb, öldürülənlər 25-50 yaş arasında olub. Onlardan bəzilərinin təxminən 6 ay öncə dəfn edildiyi müəyyən olunub.
Slamet Toharinin daha öncə 2019-cu ildə saxta pula görə həbs edildiyi açıqlanıb. Şamanın törətdiyi qətllərə görə isə ölüm cəzası alacağı gözlənilir.
Lalə
Sfera.az