Etiraz üçün əllərini asfalta yapışdırdılar - FOTO
Almaniyanın Hamburq şəhərində iqlim fəalları qeyri-adi etiraz aksiyası keçiriblər.
Sfera.az xarici mətbuata istinadən xəbər verir ki, fəallar əllərini asfalta yapışdıraraq nəqliyyatın hərəkətinə mane olublar.
Almaniyanın Hamburq şəhərində 3 həftədir nümayiş keçirən İqlim Aktivistləri bu dəfə Elbe tunelinin girişi və Elbe körpüsünün çıxışı olmaqla iki fərqli nöqtədə etiraz səslərini yüksəldiblər.
Maşınlardan düşərək yola əyləşən etirazçılar əllərində pankartlar tutaraq şüarlar səsləndiriblər. Daha sonra onlar əllərini asfalta yapışdırıblar. Aksiya səbəbilə tunel və körpü nəqliyyata bağlanıb, şəhər mərkəzinə qədər 30 kilometrlik tıxac yaranıb.
Hadisə yerinə çoxlu sayda polis, yanğınsöndürən və təcili yardım maşınları gəlib.
Təhlükəsizlik qüvvələri özləri ilə gətirdikləri zeytun yağı, əl üçün təhlükəsiz mayelər və digər vasitələrlə aktivistlərin əllərindəki yapışqanı təmizləməyə çalışıblar. Uzun müddət mübarizə apardıqdan sonra iqlim fəallarını asfaltdan “sökmək” mümkün olub.
Polis etirazçıları saxlayıb.
Lalə
Sfera.az