Məlum olduğu kimi, Dövlət Təhlükəsizliyi Xidməti, Baş Prokurorluq və Daxili İşlər Nazirliyi tərəfindən “Kərimə dövləti” qurmaq iddiasında olan və İran xüsusi xidmət orqanları ilə əməkdaşlıq edən şəxslər saxlanılıb.

Ümumiyyətlə, son vaxtlar bu istiqamətdə davamlı əməliyyatların keçirildiyini,  dövlət maraqlarına zidd hərəkətlər edən iranpərəstlərin aşkar edildiyinin şahidi oluruq.

Maraqlıdır, son əməliyyat tədbirindən sonra iranpərəstlərin sayının azalacağı gözlənilirmi?

Məsələ ilə bağlı Sfera.az-a açıqlama verən beynəlxalq məsələlər üzrə siyasi şərhçi Əziz Əlibəyli İranın Azərbaycanda dövlətçilik əleyhinə şəbəkə qurmaqda bir neçə məqsədinin olduğunu deyib:

"Bu əməliyyatların əsas məqsədi İran tərəfindən dini hissləri istismar olunan, yetişdirilən şəxslərin ifşasıdır. Onlar Azərbaycanda “Kərimə dövləti” qurmağa, "Hüseyniyyun" terror təşkilatının prinsiplərindən istifadə edərək Azərbaycan dövlət və dövlətçiliyinə hücumlar təşkil etmək, ictimai asayişi, təhlükəsizlik mühitini pozaraq dövlət qurumları ilə vətəndaşlar arasında ciddi narazılıq atmosferi yaratmaqdan ibarətdir. Bu əməliyyatlar İranla aparılan psixoloji-diplomatik savaşın mühüm tərkib hissələrindən ibarətdir. Azərbaycanda bu şəbəkə 30 ildir fəaliyyət göstərir və bu müddətdə şəbəkə üzvləri azalmaq əvəzinə artıb. Onların gözlərini İslam şiəliyi adı ilə boyayıb, imamların adları ilə istismar ediblər. İndi Azərbaycana qarşı hücumları sionist və digər arqumentlərlə bəzəyib ortaya atmaqdadırlar. Bu savaşın köklündə dayanan səbəblər Azərbaycanın Qarabağ müharibəsindəki qalibiyyəti və Zəngəzur dəhlizini açmaq istəyidir. İran əslində buna qarşı savaş aparır".

Ekspert İranın ölkə gənclərinin sağlamlığının qəsdinə dayandığını da vurğulayıb:

"İran Kərimə dövlətini Azərbaycan gənclərinin beyinlərinə yazıb onları bədbəxt etməklə yanaşı, gənclərimizin sağlamlığını təhlükə altına alan narkoticarətin yayılmasına maraq göstəir. Azərbaycan dövləti bu məsələdə təkcə hüquq mühafizə orqanlarının həbsləri ilə maraqlı deyil, həm də dini siyasətin mənəvi ehkamları, dinimizdən irəli gələn tövbə məsələsini də qabartmalıdır. Bu şəxslərin içərisində yüzlərlə aldanmış şəxs var və onlar qəbul etməlidir ki, dövlətçiliyə qarşı cinayət etmək olmaz. Bunun üçün onlar tövbə etsələr, həqiqətlərin aşkar olunmasında, təhlükənin qarşısının alınmasında hüquq mühafizə orqanları ilə əməkdaşlıq etsələr, onlar üçün daha yaxşı olar. Bu isə öz növbəsində sözügedən şəbəkənin üzvlərinin sayının azalması ilə nəticələnər".

Əzizə Zeynal