NATO-nun Rusiya ilə bağlı “B” PLANI: Bu ölkələrdə ikinci cəbhə açılacaq
NATO Baş katibi Yens Stoltenberq Putinin sülhə yox, daha böyük müharibəyə hazırlaşdığını deyib. O söyləyib ki, alyans öz təhlükəsizlik imkanlarını gücləndirməyə, Ukraynaya yardım göstərməyə və Rusiyanın təzyiqi altında olan digər tərəfdaşlarına dəstək verməyə davam edəcək: “Mən dünən Ukrayna xarici işlər naziri Dmitro Kuleba ilə danışdım. Biz qərara gəldik ki, NATO müttəfiqləri Ukraynaya dəstəyi davam etdirsin və artırsın. Məqsədimiz Ukraynanın qalib gəlməsidir”. Baş katibin sözlərinə görə, NATO Moldova, Gürcüstan və Bosniya və Herseqovina da daxil olmaqla, Rusiyadan təzyiq hiss edən digər tərəfdaşları da dəstəkləyəcək.
Stoltenberqin bəyanatı ilə bağlı Sfera.az-a açıqlama verən siyasi şərhçi Kənan Novruzov deyib ki, NATO müharibənin bitməsində maraqlı deyil:
“Alyans ölkələri məhz Ukrayna “kartından” istifadə etməklə Rusiyanı zəiflətməyə çalışır. Rusiya isə hələ ki, müqavimət göstərir. Ukrayna rəsmiləri, o cümlədən Prezident Volodimir Zelenski söyləyib ki, müdafiə qüvvələri qarşıdakı aylarda əks-hücum əməliyyatlarına başlayacaqlar. Rəsmi Kiyevin bu açıqlaması ilə Stoltenberqlə Kulebanın əldə etdiyi razılıq bir-birini tamamlayır. Yəqin ki, yaxın vaxtlarda NATO Ukraynaya daha çox hərbi texnika göndərəcək. Çünki bu, alyansın özünə lazımdır”.
Müsahibimiz son günlər Rusiyaya qarşı ikinci cəbhənin açılması məsələsinin də gündəmdə olduğunu vurğulayıb:
“Rusiya Xarici Kəşfiyyat Xidmətinin direktoru Sergey Narışkin bu günlərdə demişdi ki, Qərb Gürcüstanda ikinci cəbhə açmağa çalışır. Əslində, bu, mümkündür. NATO həm Moldovanın, həm də Gürcüstanın təhlükəsizliyini təmin etmək adı ilə gələcəkdə bu ölkələrdə Rusiyaya qarşı ikinci cəbhə aça bilər. Rusiyaya təzyiqlər artırılacaq. Bu baxımdan alyans “B variantı” kimi Gürcüstan və Moldova “kartından” istifadə edə bilər”.
Günay Rəsulqızı