Rusiyanın xarici işlər naziri Sergey Lavrov türkiyəli həmkarı Mövlud Çavuşoğlunun dəvəti ilə Türkiyəyə ikigünlük səfərə başlayır.

Sfera.az TASS-a istinadən xəbər verir ki, onların enerji məsələləri, Ukraynadakı vəziyyət, taxıl sazişinin icrası, o cümlədən Dağlıq Qarabağda vəziyyətin normallaşdırılması tədbirləri və Ankaranın Dəməşqlə dialoqu da daxil olmaqla geniş spektrli məsələlər üzrə danışıqlar aparacağı gözlənilir.

Bununla yanaşı, Rusiya XİN-nin məlumatına görə, Lavrov və Çavuşoğlunun Rusiya vətəndaşlarının tətil mövsümündə türkiyədəki təhlükəsizlik problemləri ilə bağlı fikir mübadiləsi aparacağı bildirilir.

Digər mühüm mövzu isə Putinin Türkiyədə qaz qovşağı yaratmaq təşəbbüsü olacaq. Türkiyə prezidenti qeyd edib ki, "zəlzələ ilə əlaqədar gecikmələrə" baxmayaraq, Ankara bu layihənin tezliklə həyata keçirilməsi üçün səylərini əsirgəmir. Türkiyənin Energetika və Təbii Sərvətlər Nazirliyindən TASS-a verilən məlumata görə, qaz qovşağı layihələri bu il istifadəyə veriləcək. Gözlənilir ki, tərəflər hazırkı danışıqlar zamanı tərəflər layihənin icra müddətləri ilə bağlı məsələyə aydınlıq gətirə biləcəklər.

Bundan başqa, Rusiya Xarici İşlər Nazirliyinin sözçüsü Mariya Zaxarova Lavrovun səfəri ərəfəsində jurnalistlərə bildirib ki, iki xarici işlər nazirləri “müxtəlif səviyyələrdə ikitərəfli təmasların cədvəlini” razılaşdıracaqlar.

Tərəflərin beynəlxalq və regional problemlərə də toxunacağı gözlənilir. Türkiyə lideri dəfələrlə Rusiya və Ukrayna arasında danışıqlar təşkil etmək istədiyini və nazirlərin bu mövzuya da toxunacaqlarını bildirib.

Lavrov və Çavuşoğlunun Dağlıq Qarabağdakı hazırkı vəziyyəti müzakirə edəcəyi istisna edilmir. Rusiya Xarici İşlər Nazirliyi səfərdən əvvəl bildirib ki, Cənubi Qafqazda əməkdaşlığın gücləndirilməsi, o cümlədən Ermənistan və Türkiyə arasında münasibətlərin bərpası məsələlərini “ətraflı müzakirə etmək” planlaşdırılır.

Əzizə Zeynal