Kral III Çarlzın tacqoyma mərasiminin dəvətnaməsi ictimaiyyətə təqdim edildi - FOTO
İngiltərə kralı III Çarlzın mayın 6-da keçiriləcək tacqoyma mərasimi üçün hazırlanan dəvətnamə ictimaiyyətə təqdim edilib.
Sfera.az xarici mətbuata istinadən xəbər verir ki, Bukinqem Sarayı paytaxt Londondakı Vestminster abbatlığında keçiriləcək tacqoyma mərasimi üçün çap edilən dəvətnamələrin fotosunu yayıb.
Mərasimdə iştirak edəcək şəxslərə göndərilməsi planlaşdırılan dəvətnamədə konsort Kamillanın ünvanının “Kraliça” kimi yazılması diqqət çəkib
2000 nüsxə ilə çap olunacaq dəvətnamə üçün ingilis folkloruna müraciət edilib. Belə ki, dəvətnamadə "Yeni hökmranlığı əks etdirmək üçün baharı və dirçəlişi simvolizə edən qədim Yaşıl Adam fiquru"na yer verilib.
Ölkənin çəmənliklərində bitən güllərlə bəzədilmiş dəvətnamə ilə yanaşı kral arxivindən ən qədim tacqoyma dəvətnaməsinin fotosu da paylaşılıb. Qeyd edilib ki, “Kral arxivindəki ən qədim tacqoyma dəvətnaməsi 22 sentyabr 1761-ci ilə aiddir. Həmin tarixdə Kral III Corc və Kraliça Şarlottanın tacqoyma mərasimi baş tutub”.
Lalə
Sfera.az