Argentinanın təhlükəsizlik naziri Serxio Berni hücuma məruz qalıb. 

Sfera.az xarici mətbuata istinadən xəbər verir ki, tətil edən avtobus sürücülərinə baş çəkmək üçün Buenos-Ayres muxtar şəhərinə gedən nazir daş, çubuq və yumruqla qarşılanıb. 

Berninin səmimiyyətinə inanmayan sürücülər ona qarşı hücuma keçiblər. Bir nəfər nazirə yumruq vurub. Üzü qan içində qalan nazirin başına velosiped dəbilqəsi taxılıb. Daha bir neçə nəfər isə Berni tərəfə daş və avtomobil hissələri atıb.

Prokurorluq hadisə ilə bağlı araşdırmalara başlayıb, bir nəfər adam öldürməyə cəhddə şübhəli bilinərək saxlanılıb. Berni isə, “mən üzləşməyə gəlmişdim” deyib.

Nə baş verib?

Buenos-Ayresdə avtobus sürücüləri bir müddətdir ki, tətil edirlər. Buna səbəb isə kriminal dəstələrin tez-tez sərnişin daşıyan avtobus sürücülərinə hücum etmələridir. Sürücülər təhlükəsizlik tədbirlərinin artırılmasını istəyirlər. 65 yaşlı avtobus sürücüsü Daniel Barrientos belə hücumlardan birində öldürülüb. Tətil Barrientos üçün ədalət tələbi ilə başlayıb. Avtobus sürücüləri günahkarlar cəzalandırılmayana qədər tətili dayandırmayacaqlarını bildirirlər.

Lalə
Sfera.az