Deputat Könül Nurullayeva vətəndaşlarla görüşdü - FOTO
24 saylı seçki dairəsi üzrə Milli Məclisin deputatı Könül Nurullayeva qərargahına daxil olan müraciətlərə əsasən növbəti vətəndaş qəbulunu keçirib. Deputat qəbul zamanı vətəndaşlarımızla görüşərək, onların dilə gətirdiyi şikayətlər ətrafında qarşı tərəflə geniş fikir mübadiləsi aparıb.
Könül Nurullayeva, eyni zamanda Nizami rayon sakinləri ilə səyyar görüşlərini də müntəzəm olaraq davam etdirir. Belə ki, millət vəkili K.Nurullayeva M.X.Şərifli küçəsi 94, 94B və 96 ünvanlarında yaşayan seçicilərinə baş çəkərək, onların rastlaşdığı gündəlik problemlər ilə yerindəcə tanış olub.
Bildirmək istərdik ki, vətəndaşlarla görüş zamanı qəbul iştirakçılarını narahat edən problemlər sırasında aztəminatlı ailənin qarşılaşdığı məişət problemləri, işlə təmin olunma, ünvanlı sosial yardım almaqda çətinliklər yaşayan vətəndaşa köməkliyin göstərilməsi, binaya giriş hissələrinin və dam örtüyünün əsaslı təmir olunması, məhəlləyə su sayğacının quraşdırılması, ağaclara aqrotexniki qulluğun göstərilməsi və s. bu kimi məsələlər başlıca yer almışdır. Millət vəkilinin qərargahından verilən məlumata görə, seçicilərin görüş ərzində deputat Könül Nurullayevaya çatdırdığı bütün müraciətlər səlahiyyətləri daxilində qeydiyyata götürülmüşdür və ən yaxın zamanda aidiyyəti üzrə müvafiq qurumlara ünvanlanacaqdır.
