Sankt-Peterburqdakı terrorun DETALLARI: Aleksey Navalnı ilə əlaqəsi olub, əri Özbəkistanda...
Aprelin 2-də Sankt-Peterburqda baş verən terror hadisəsinə görə həbs edilən 26 yaşlı Daria Trepovanın Ukraynanın xüsusi xidmət orqanları və Rusiya müxalifətinin lideri, hazırda həbsdə olan Aleksey Navalnı ilə əlaqələrinin olduğu üzə çıxıb.
Sfera.az “The Telegraph”a istinadən xəbər verir ki, Daria Trepova Rusiyanın təhlükəsizlik xidmətinə verdiyi ilkin ifadəsində partlayışın baş verdiyi kafeyə içərisində bomba olan heykəlciyi gətirdiyini etiraf edib.
Xatırladaq ki, bazar günü Sankt-Peterburqdakı kafelərin birində Kremlin təbliğatçısı, hərbi jurnalist Vladlen Tatarski bombanın partlaması nəticəsində öldürülüb. Onunla bərabər kafedə olan daha 30 nəfər yaralanıb.
Tatarski Ukrayna müharibəsində davamlı olaraq Rusiyanın maraqlarını müdafiə edirdi və o, bununla bağlı müxtəlif materiallar hazırlayaraq yayırdı.
Məlumatlara əsasən, dünən Rusiyanın FTX-si Daria Trepovanın Sankt-Peterburqdakı mənzilinə daxil olub və onu həbs edərək ilkin etiraf videosunu çəkib. Kadrlarda xanım Trepova yorğun görünür. FTX zabiti ondan niyə həbs olunduğunu başa düşdüyünü soruşur. O, əsəbi halda gülümsəyir, ah çəkir və deyir: “Mən deyərdim ki, Vladlen Tatarskinin öldürüldüyü yerdə olmuşam”.
Sonra məmur ondan nə etdiyini soruşur. "Oraya partlayan heykəlciyi gətirmişəm" cavabını verir.
Trepovanın əri Dmitri Rılov də hadisə ilə bağlı açıqlama verib. Rılov hazırda Özbəkistanda mühacirətdə yaşayır. O jurnalistlərə deyib ki, yoldaşı heç vaxt təkbaşına belə bir şey edə bilməzdi.
Trepovanın anası və bacısı da təhlükəsizlik qüvvələri tərəfindən dindirilib. Eyni zamanda Rusiya hökuməti Özbəkistan hakimiyyətindən Dmitri Rılovun həbsini xahiş edib.
Vasif