“Əli Kərimli, sən hansı çəkinin sahibisən ki...” – Razi Nurullayev
"Bu yaxınlarda AXCP sədri Əli Kərimlinin partiya üzvləri qarşısında çıxışı bir vətəndaş kimi məni çox narahat edib. O, ağına-bozuna baxmadan müxalifətin və iqtidarın əleyhinə əsassız fikirlər səsləndirib".
Sfera.az xəbər verir ki, bu fikirləri Milli Məclisin iclasında millət vəkili Razi Nurullayev bildirib. Deputat Ə.Kərimlinin Rusiya və İranın Azərbaycanla müharibəyə başlamasını arzuladığını deyib:
"Əli Kərimli 30 illik işğala son qoyan və bu gün də Qarabağda separatizmin kökünü kəsmək üçün ağır şərtlər altında siyasət yürüdən Prezident İlham Əliyevi və hamımızı az qala, xəyanətdə ittiham edir. O, Ukrayna xalqını öyərək deyir ki, onlar Rusiya ilə mübarizədə sınmırlar. Mən zaman-zaman bu hakimiyyətin daxili, xüsusilə də sosial siyasətini tənqid etmişəm, amma İlham Əliyevin Qarabağ siyasətini tənqid etmək vicdansızlıq olar. Adamın ağzı əyilər, Allah bu ədalətsiliyi götürməz axı.
O deyir ki, "Azərbaycan ordusu niyə Xankəndinə girmədi və niyə Rusiya ilə müharibəyə başlamadıq?". Bu adam ya xalqı avam sayır, ya da qisas hissi o qədər gözünü tutub ki, nəticəsini hesablamadan xalqın hissi ilə oynayıb narazılıq dalğası yaratmaq istəyir. Deyir, “biz dedik ki, Xankəndinə girmək lazımdır”, amma sözümüzü dinləmədilər. Sən hansı çəkinin sahibisən ki, dediyin doğru olsun və sonra da dediyin sözün yükünü çəkə biləsən? Sən heç Elçibəydən qalan bir partiyanın bütövlüyün qoruya bilmədin, on yerə parçalandı, indi Azərbaycanı da beləcə parçalamaq niyyətiniz var. “Xankəndiyə niyə girmədik” deyənlərin əksəriyyətinin övladları və özləri Qarabağda döyüşdə olmayıb, olmaq fikirləri də yoxdur. O cümlədən, Əli Kərimlinin".
Əzizə Zeynal