Rublda ucuzlaşma üçüncü ayına keçib – SON MƏZƏNNƏ
Rusiya rublunun məzənnə dəyərində bu ilin əvvəlindən müşahidə edilən enmə hələ də davam edir.
Sfera.az xəbər verir ki, 2023-cü ilin yanvarında dollar/rubl kursu 68 olduğu halda hazırda 79 həddini keçib. Son 3 ayda dolların rubla nəzərən məzənnəsi 16,2 faiz yüksəlib.
Rublun ucuzlaşmasının bir neçə səbəbi var. Neftin bahalaşması, sanksiyaların təsirinin hiss edilməsi, Rusiyanın ixrac etdiyi neftə tavan qiymətin tətbiq edilməsi, birinci rübdə dövlət büdcəsində böyük kəsirin yaranması rublun dəyərdən düşməsində əsas səbəblərdəndir.
Azərbaycanda da rublun ucuzlaşması müşahidə edilir. Yanvarda 1 rubl 0,025 manat olduğu halda hazırda 0,0217-dir.
Rublun ucuzlaşmasının Azərbaycana müsbət və mənfi təsiri var. Müsbət təsiri idxal edilən malların ucuzlaşması şəklində göstərir. Rubl ucuzlaşdıqda Rusiya istehsalı olan mallar manat ifadəsində dəyərdən düşür.
Mənfi təsiri isə Azərbaycandan ixracın çətinləşməsidir. Rubl ucuzlaşdıqda ölkəmizdən Rusiyaya ixrac edilən malların dəyəri artır ki, bu da həmin məhsulların alışını azaldır.
Vasif