Qiymətlərin artması siqaret istehlakını azaldır – RƏQƏMLƏR
Azərbaycanda pərakəndə şəkildə satılan siqaretlərin qiymətində 10 qəpik artım qeydə alınıb. Müşahidə edilən qiymət artımı 2023-cü ildə siqaretlərdə qeydə alınan ilk bahalaşmadır.
Sfera.az bildirir ki, son illərdə siqaretlərin qiymətində mütəmadi artım baş verir. Bu artımların hesabına 5 il ərzində, yəni 2018-ci ildən bəri siqaretlərin dəyəri 2 dəfəyə (100 faiz) yaxın artıb.
2018-ci ilin martında 1 qutu filtrli siqaretin orta qiyməti 1,34 manat olub. Orta qiymət 2019-cu ilin martında 1,64 manata, 2020-ci ildə 1,96 manata, 2022-ci ildə 2,5 manata, 2023-cü ildə isə 2,68 manata yüksəlib.
Siqaretlərin dəyəri son 5 ildə orta hesabla 1,34 manat yüksəlib.
Qeyd edək ki, Azərbaycan hələ də siqaretlərin pərakəndə satış qiyməti aşağı olan ölkələrdən hesab olunur. Ümumdünya Səhiyyə Təşkilatı siqaret istehlakının azalması üçün Azərbaycan hökumətinə siqaret qiymətlərinin artırılmasını tövsiyə edir.
Həqiqətən də, qiymətlərin artması ölkəmizdə siqaret istehlakına azaldıcı təsir göstərir. Son 5 ildə qiymətlərin 2 dəfə artması müqabilində tütün məmulatlarının pərakəndə satışı 2 dəfədən xeyli az artıb. Belə ki, tütün məmulatlarına xərclənən pul 2017-ci ildə 1,1 milyard manat olduğu halda, 2021-ci ildə 1,524 milyard manata yüksəlib. Beş ildə xərclərdəki artım cəmi 40 faizə yaxın olub.
Əhalinin sayının artmasına və qiymətlərdəki 2 dəfə yüksəlişə baxmayaraq, satış dövriyyəsinin 40 faiz genişlənməsi ondan xəbər verir ki, qiymət artımları siqaret istehlakına azaldıcı təsir edir.
Vasif