Rusiya Ukrayna qırıcılarını pusquya salmaq üçün mürəkkəb “tələlər” qurur.

Sfera.az bildirir ki, bu barədə ukraynalı mayor Vadim Voroşilov “The Telegraph”a açıqlamasında deyib. O, köhnə sovet təyyarələrindən istifadə edərək ruslarla mübarizə aparmağın hər gün çətinləşdiyini söyləyib və Qərbdən F-16 qırıcıları göndərməyi xahiş edib.

“Ruslar hər zaman taktikalarını dəyişirlər, ona görə də müharibə sabit deyil. Tələlər düzəldirlər. Ukraynalı pilotlar isə Sovet dövründən qalma MiQ-29-ları idarə etməyə davam etdikcə, döyüş meydanında çox şey edə bilməyəcəklər. “Sukhoi Su-35” müasir hava döyüş təyyarələri və “Su-34” bombardmançı təyyarələri ilə uçan rusları məhv etmək çətin olub. Hazırda biz ancaq düşmən hücumunun qarşısını ala bilirik. Lakin F-16-larla piyadaları qorumaq üçün aerodrom, eləcə də dənizlər və yerə nəzarət edə bilirdik. Düşməndən daha yaxşı olmaq üçün müasir təyyarələrə ehtiyacımız var”, deyə V.Voroşilov söyləyib.

“The Telegraph” xatırladıb ki, Ukrayna daha əvvəl də ABŞ istehsalı olan F-16-ların alınması üçün müraciət edib. Bununla belə, Co Bayden bu yaxınlarda Ukraynanı F-16 qırıcıları ilə təmin etmək istəmədiyini bildirib. Ukrayna Hərbi Hava Qüvvələri Komandanlığının aviasiya şöbəsinin rəisi, polkovnik Volodimir Lohaçov isə bunları deyib:

“Gözləməyə davam etdikcə daha çox pilot itirəcəyik. F-16-larda təlim keçə biləcək ən qabaqcıl pilotların siyahısı əlimizdə var idi. Təəssüf ki, onlardan bəziləri artıq döyüş zamanı öldürülüb. Eyni zamanda, Rusiya təyyarələrindəki radarlar bizdə olandan təxminən dörd dəfə yaxşıdır və onlar daha çoxunu görə bilirlər. Düşmən raketləri bizim sovet raketlərindən xeyli güclüdür. Bu baxımdan vəziyyət getdikcə təhlükəli olur. Bəzən biz rusların raket atdığını belə görə bilmirik. Bu da pilotlar üçün yaxşı hal deyil”.

Nəşrin məlumatına görə, daha təkmil Qərb qırıcıları ilə bağlı vədlərin olmamasına baxmayaraq, ukraynalı pilotlar hələ də nikbin olaraq qalırlar. Qeyd olunub ki, əksər ukraynalı pilotlar və mühəndislər artıq intensiv ingilis dili dərsləri keçirlər: “Çünki onlar qərb silahları ilə təlim keçmək vaxtı gəldikdə təlimatçılarını başa düşməlidirlər”.

Vadim Voroşilov  son olaraq bildirib ki, rusların 40 hava bazası, ümumilikdə 700-dən çox təyyarə və helikopteri var: “Hazırda Qərb təyyarələrini əldə etmək məsələsi üzərində işləyirik, çünki əlimizdə olanlar döyüş meydanında effektiv olmaq üçün kifayət deyil”.

Türkan