ABŞ dövlət katibi Entoni Blinken rusiyalı həmkarı ilə telefon danışığında həbsdə olan “Wall Street Journal”ın müxbirini azad etməyə çağırış edib.

Sfera.az xarici mediaya istinadən  xəbər verir ki, Rusiyanın xarici işlər naziri Sergey Lavrov isə cavab olaraq bildirib ki, ABŞ “hay-küy salmağa” və həbsi siyasiləşdirməyə çalışmamalıdır.

Bazar günü Rusiya Xarici İşlər Nazirliyi təsdiq edib ki, Lavrov və Blinken ABŞ-ın təşəbbüsü ilə telefon danışığı zamanı cənab Qerşkoviçin həbsini müzakirə ediblər.

ABŞ Dövlət Departamentinin yaydığı mətndə isə qeyd edilib ki, Blinken “ABŞ vətəndaşı olan jurnalistin qəbuledilməz şəkildə saxlanmasından böyük narahatlığını” çatdırıb.

Lavrov isə cavab olaraq Rusiyanın Qerşkoviçin “məxfi məlumat əldə etməyə cəhd edərkən cinayət başında tutulduğu” və onun işinə Rusiya məhkəmələri tərəfindən baxılacağı barədə iddialarını təkrarlayıb.

Lavrov həmçinin ABŞ rəsmilərinə və mediaya xəbərdarlıq edib ki, jurnalistin həbsi ətrafında “isteriya” alovlandırmasınlar. Vurğulanıb ki, Vaşinqton rəsmiləri və Qərb KİV-lərinin bu işə siyasi çalar vermək məqsədi ilə isteriya qızışdırması yolverilməzdir.

Zəng zamanı Blinken həmçinin Rusiyada saxlanılan digər ABŞ vətəndaşlarının, o cümlədən beş ildən artıqdır ki, casusluq ittihamı ilə saxlanılan keçmiş ABŞ dəniz piyadası Pol Uilanın azad edilməsinə çağırış edib.

Qeyd edək ki, 31 yaşlı Qerşkoviç Moskvada tanınmış müxbirdir. Ötın həftə çərşənbə günü günortadan sonra “Wall Street Journal”ı ilə onun bütün əlaqəsi kəsilib, bundan sonra onun Rusiya təhlükəsizlik xidməti tərəfindən həbs olunduğu məlum olub.

Rusiya tərəfi iddia edir ki, Qerşkoviç Rusiya müdafiə xidmətinin fəaliyyəti ilə bağlı dövlət sirri sayılan məlumatları toplayıb.

Onun mayın 29-dək həbsdə qalması barədə qərar çıxarılıb. Xatırladaq ki, Rusiyada casusluq üçün maksimum 20 il həbs cəzası nəzərdə tutulur. Qerşkoviçin həbsi bütün dünya jurnalistləri tərəfindən kəskin şəkildə pislənib.

Əzizə