Ukrayna Silahlı Qüvvələrinin Quru Qoşunlarının komandanı Aleksandr Sirski Rusiya ordusunun Baxmut şəhərinə hücum üçün canlı qüvvəsinin tükəndiyini deyib.

“Müdafiə qüvvələrimiz şərqdə düşmənə böyük itkilər yaşadaraq Baxmutu müdafiə edirlər. Bəzi bölgələrdə düşmən çox aqressivdir. Çünki insan resursları azalır və vaxt onların əleyhinə işləyir”, deyə o söyləyib.

Bununla bağlı Sfera.az-a açıqlama verən siyasi şərhçi Kənan Novruzov xatırladıb ki,  Rusiya yarım ildir Baxmutda mübarizə aparır və bu istiqamət onlar üçün mühümdür:

“Rusiya ordusu Baxmutu ələ keçirdikdən sonra digər istiqamətlər üçün də yol açılacaq. Eyni zamanda Rusiya ordusunun komandanlığı başa düşür ki, Baxmutun işğalı Ukraynaya psixoloji təsir ola bilər. Ona görə də Rusiya ordusu hələ də sözügedən şəhərdən çıxmır. Rusiya Silahlı Qüvvələrinin Baxmutda “dalana dirənməsinin” isə 3 əsas səbəbi var. Bunlardan birincisi Ukrayna hərbçilərinin uğurlu mübarizəsidir. İkincisi, Qərbin Ukraynaya davamlı dəstəyi, üçüncüsü isə Rusiya ordusundakı xaosdur. Bəllidir ki, Rusiya Müdafiə Nazirliyi ilə “Vaqner” muzdlu hərbi təşkilatının fikirləri bir çox hallarda üst-üstə düşmür. Bu, özünü cəbhənin bir çox istiqamətlərində, o cümlədən Baxmutda da göstərir”.

Müsahibimiz deyib ki, Baxmutda döyüşlər davam etdikcə, Rusiyanın itkiləri daha da artacaq: “Amma Rusiyanın yaxın vaxtda Baxmutdan əl çəkəcəyi gözlənilmir. İndi əsas sual budur: Baxmut Rusiya ordusu üçün məzar olacaqmı?”.

Günay Rəsulqızı