Dəməşq rejimi Suriyanın böyük hissəsini nəzarət altına aldıqdan sonra “işsiz” qalan silahlı müxaliflərdən biri olan Şahbanov İdlibdə suşi restoranı açıb. 

Sfera.az xəbər verir ki, 2015-ci ildə Dağıstandan Suriyaya gələn və “Faylak ul-Şam” qruplaşmasının tərkibində 5 il rejim qüvvələrinə qarşı vuruşan 37 yaşlı İslam Şahbanov artıq suşi restoranı işlədir.

Fransanın xəbər agentliyinin (AFP) məlumatına görə, rusiyalı cihadçı Dəməşq rejiminin ölkənin böyük bir hissəsinə nəzarəti ələ keçirməsindən sonra “işsiz” qalan əcnəbi döyüşçülərdən biridir. O, silahlarını vasabi ilə “əvəz etməyə” məcbur olub. 

Daha əvvəl Pakistan, İndoneziya, Səudiyyə Ərəbistanı kimi ölkələrdə olan Şahbanov, səfərləri zamanı Yapon mətbəxini daddığını və çox bəyəndiyini, 3 milyon insanın yaşadığı İdlibdə suşi restoranı açmağa qərar verdiyini açıqlayıb.

Keçmiş cihadçı, yeni suşici Şahbanov turşu zəncəfil, soya sousu, karides və hətta xərçəng kimi inqrediyentlərinin əksəriyyətini Türkiyədən idxal edir.

Restoranda suşi paketləri 60 türk lirəsinə satılır. Bu, İdlibdə məşhur olan böyük dönərdən iki dəfə bahadır. Daha çox müştəri üçün menyuya qızardılmış məhsullar əlavə edəcəyini deyən Şahbanov müharibəyə qayıda biləcəyini də istisna etməyib. 

Lalə
Sfera.az