O, Putindən üz çevirir? – Si Cinpin niyə Zelenski ilə görüşməyə məcburdur?
“Çin sədri Si Cinpin Kiyevə getməklə Kreml sahibi Vladimir Putinlə tərəfdaşlığına kölgə salmaq istəmir”.
Sfera.az bildirir ki, bunu politoloq Elxan Şahinoğlu Zelenskinin Çin liderini ölkəsinə dəvət etməsini şərh edərkən deyib. Ekspert qeyd edib ki, Pekin Rusiyadan ucuz neft və qaz almaqda maraqlıdır:
“Pekin Zelenskini Vaşinqtonun müttəfiqi sayır, təlimatlar əsasında hərəkət etdiyini düşünürlər. Si Cinpin bu səbəbdən Kiyevə gedib Zelenski ilə görüşmək istəmir. Digər tərəfdən, o, Ukrayna lideri ilə görüşmədən iki ölkə arasında vasitəçi ola bilməyəcək. Əslində Pekin vasitəçi olmaq da istəmir, sadəcə Si Cinpin Qərbin Çinə qarşı artan təzyiqlərindən qurtulmaq üçün özünü “sülhdə maraqlı olan tərəf” kimi göstərmək istəyir. Ancaq bu alınmır. Pekinin vasitəçiliyinin Rusiyanın xeyrinə olduğunu hamı anlayır”.
Politoloq xatırladıb ki, Çin sədrinin 12 maddəlik təkliflərində Rusiya ordusunun Ukrayna ərazisini tərk etməsi vacibliyi göstərilməyib:
“Təklifllərin ümumi mahiyyəti budur ki, tərəflər arasında atəşkəs elan olunsun. Qarabağ nümunəsində atəşkəsin nəyə səbəb olduğunu bilirik, bu, işğalın rəsmiləşdirilməsinə şərait yaradır. Rusiya-Ukrayna müharibəsində atəşkəs elan olunarsa, Rusiyanın işğalçı qoşunları Ukrayna ərazisini tərk etməyəcək və uzun onilliklər Kiyevlə Moskva arasında nəticəsi olmayan danışıqlar davam edəcək. Bu isə Rusiyanın maraqlarına uyğundur”.
Günay Rəsulqızı