Çin lideri Si Cinpin parlamentin iclasında ölkəsinin müharibəyə hazırlaşıdığını bildirib. O, dünyanın bu mesajı ciddi qəbul etməli olduğunu söyləyib. Amma maraqlıdır ki, ölkə lideri müharibənin kimə qarşı olacağı haqda heç nə deməyib.

Maraqlıdır, Çinin hədəfindəki ölkə hansıdır? Yeni müharibə ehtimalı nə dərəcədə ciddidir?

Mövzu ilə bağlı Sfera.az-a açıqlama verən politoloq Natiq Miri Çinin müharibəyə başlayacağı halda bunun cavabsız qalmayacağını bildirib:

“Çin Tayvanı öz tərkibinə qaytarmaq üçün  uzun müddətdir ki, həm informasiya, həm də hərbi hazırlıqlar görür. Rusiya-Ukrayna müharibəsi fonunda Çinin də Tayvanı öz tərkibinə qaytarmaq iştahı qabarıb. Buna imkan vermək istəməyən və bu yöndə Tayvana kömək edən ABŞ Çinin qarşısında ən böyük əngəl olaraq görünür. Paralel olaraq ABŞ Çinin ətrafında alternativ Asiya NATO-su yaratmağa çalışır. Avstraliya, Hindistan, Yaponiya kimi güclü ölkələr də Çinə qarşı birləşiblər. Ona görə də bütün bu hərbi bloklar Çin üçün müəyyən mənada çəkindirici xarakter daşıyır. Ancaq Çinin müharibəyə hazırlaşması ilə bağlı  açıqlaması böyük ehtimalla Tayvanı hərbi əməliyyatlarla yenidən öz tərkibinə qaytarması ilə əlaqəlidir”.

Çinin Hindistanla da müəyyən ərazi problemlərinin olduğunu xatırladan ekspert bunları deyib:

“Lakin Çinlə Hindistan arasında böyük müharibə ehtimalı üfüqdə belə görünmür. Çin Tayvanda öz suverenliyini bərpa etmək istəyir və indiki münbit şəraiti özü üçün əla fürsət bilir. Çin bunun üçün siyasi-diplomatik yolla ABŞ-lə razılaşmağa çalışır. Ancaq Çinin iqtisadi və hərbi inkişafını önləmək məqsədilə Pekinin bu cəhdlərinə müsbət reaksiya nümayiş etdirmir”.

Politoloq Çinin Tayvana qarşı müharibə elanının Rusiya-Ukrayna savaşının taleyindən asılı olacağını bildirib:

“Düşünürəm ki, Rusiya-Ukrayna müharibəsində kimin qalib olmasından asılı olaraq hadisələr müəyyən şəkil alacaq. Əgər Qərb Rusiyaya qalib gələcəksə və Rusiyanı Ukraynadan tamamilə sıxışdırıb çıxaraqcaqsa, o zaman Çinin müharibə başlada bilmək ehtimalı azalacaq. Lakin Rusiya qələbə çalarsa, bu, Çinin əl-qolunu aça bilər ki, bu da Asiyada yeni bir yanğın bölgəsinin yaranmasına gətirib çıxaracaq”.

Əzizə Zeynal