Ötən gün Azərbaycan Mərkəzi Bankının İdarə Heyətinin qərarı ilə uçot dərəcəsi 8,75%-ə, faiz dəhlizinin aşağı həddi 7%-ə, faiz dəhlizinin yuxarı həddi isə 9,75%-ə qaldırılıb.

Bununla bağlı Sfera.az-a açıqlama verən iqtisadçı Eldəniz Əmirov deyib ki, uçot dərcəsinin qaldırılmasında əsas məqsəd infilyasiyanın cilovlanmasıdır:

“Digər bir maraqlı məqam, Mərkəzi Bankın yenə də 2023-cü ildə illik inflyasiyanın 8% ətrafında olacağı proqnozunu yenidən təsdiqləməsidir. İlk baxışdan verilmiş 8%-li proqnoz və davamlı uçot dərəcəsində olan artırılmalar təzadlı görünə bilər. Axı uçot dərəcəsini qaldırılması həm də iqtisadi aktivliyi boğur. Amma aşağı proqnoz və uçot dərəcəsinin artırılması arasında bir məntiqi əlaqə var. Bu da uçot dərəcəsinin davamlı artırılması hesabına infilyasiyanın 8%-ə endirilməsinə nail olmaqdır. Bu, həm xarici, həm də daxili faktorlara görə vacibdir. May ayının 3-ündə bu məsələ ilə bağlı növbəti qərar veriləcək. 8%-li proqnozu təkrar yadımıza salsaq, mayda uçot dərəcəsində yenə də artımın olma ehtimalından söz aça bilərik”.

Ekspert qeyd edib ki, uçot dərəcəsinin artırılması zamanı daha çox manatın taleyilə bağlı məsələ gündəmdə olur:

“Hazırda manatın məzənnəsi üçün hər hansı təhdid yoxdur. Nəzərə alsaq ki, manatın arxasında 9 milyard dollardan artıq valyuta ehtiyatına sahib Mərkəzi Bank durur və manata ciddi təzyiq etməyə hazır olan dolların cilovunu əlində bərk-bərk sıxıb saxlayıb, deməli hələlik manatın məzənnəsilə bağlı hər hansı qorxu yoxdur. Cilovun nə qədər vaxt saxlanıla biləcəyi isə bir çox faktordan asılıdır”.

Türkan