Azərbaycanda qırmızı ət qiymətlərinin yüksəlməsinin əsas səbəblərindən biri də ətlik məqsədilə saxlanılan heyvanların sayının artmamasıdır. Son illərdə ölkəmizdə əhali sayının artması ilə əlaqədar qırmızı ətə olan tələb yüksəlib. Amma həm iribuynuzlu, həm də xırdabuynuzlu heyvan sayında artım ya yoxdur, ya da olduqca azdır.  

Sfera.az xəbər verir ki, 2019-2023-cü illəri əhatə edən son 4 ildə inək və camış sayı cüzi artıb, qoyun və keçi sayı isə xeyli azalıb.

Ölkəmizdə 2019-cu ilin yanvarında 1,279 milyon baş inək və camış olduğu halda, onların sayı 2023-cü ilin yanvarında 1,289 milyon başa yüksəlib. Dörd il ərzində inək və camışların sayı cəmi 10 min baş, yəni 0,78 faiz artıb.

Bu artım əsasən südlük yönlü heyvanlar hesabına baş verib. Son illərdə Azərbaycana iri təsərrüfatlar tərəfindən südlük yönlü cins heyvanların idxalının böyük olması say artımını təmin edib. Ətlik heyvanların sayında isə artım yoxdur. 

Qoyun və keçi sayında vəziyyət acınacaqlıdır. 2019-cu ilin yanvarında 8,304 milyon baş olan qoyun və keçi sayı bu ilin yanvarında 7,752 milyon başa geriləyib. Dörd ildə xırdabuynuzlu heyvan sayı 552 min, yaxud 6,65 faiz azalıb. 

Rəqəmlərdən də göründüyü kimi yerli istehsal qırmızı ət bazarındakı artan tələbi qarşılaya bilmir. Buna görə də Azərbaycan hər il xaricdən çoxlu sayda diri inək və qoyun idxal edir. Bunun nəticəsində isə Azərbaycanda davamlı olaraq mal və qoyun ətinin qiymətində artım müşahidə olunur. Yerli istehsal artmayacağı təqdirdə ölkəmizdə mal və qoyun ətinin qiymətində artım davam edəcək. 

Vasif