Türkiyənin erməni icması müxalifət blokunun vahid namizədi, Cümhuriyyət Xalq Partiyasının lideri Kamal Kılıçdaroğluya səs verəcək. 

Sfera.az xəbər verir ki, bu proqnozu İstanbulda nəşr olunan “Aqos” erməni qəzetinin redaktoru Baqrat Estukyan "Sputnik Ermənistan"a müsahibəsində verib.

Türkiyədə keçirilən seçkilərin Ermənistan-Türkiyə münasibətlərinin normallaşmasına mümkün təsiri ilə bağlı sualı cavablandıran Estukyan bildirib ki, maydakı səsvermənin nəticələri bu prosesə ciddi təsir göstərməyəcək, çünki hakimiyyət və Ermənistanla münasibətlər məsələsində müxalifət də oxşar mövqedən çıxış edir.

O qeyd edib ki, hazırda Ermənistan-Türkiyə münasibətləri müəyyən inkişaf mərhələsindədir. Eyni zamanda, onun fikrincə, “gizli diplomatiya” baş verir, tərəflərin bütün təmasları ictimaiyyət qarşısında baş tutmur.

Lakin qeydə alınmış namizədlərin heç biri seçki proqramlarında Türkiyə-Ermənistan münasibətlərinin normallaşması mövzusunu qeyd etməyib.

Türkiyədə ümumi parlament və prezident seçkiləri mayın 14-nə təyin edilib. Martın 27-dək namizədlər yekun 100 min seçici imzası olan protokolu Türkiyə MSK-ya təqdim etməlidirlər.

Əzizə