Yeni Zelandiyada millət vəkilləri və parlament işçilərinin istifadə etdiyi ictimai telefonlarda “TikTok” tətbiqinin olması qadağan edilib. 

Sfera.az xarici mətbuata istinadən xəbər verir ki, qadağa bu ayın sonundan etibarən qüvvəyə minəcək. 

Məlumata görə, qadağanın səbəbi “TikTok”un istifadəçi məlumatlarını Çin hökuməti ilə paylaşa biləcəyi ilə bağlı bütün dünyada artan narahatlıqlardır. Beləliklə, Çində yerləşən “ByteDance” şirkətinə məxsus “TikTok” ABŞ və İngiltərədən sonra daha bir ölkədə təhlükəsizlik səbəbi ilə qadağan edilib. 

Qadağa ABŞ və İngiltərədəki kimi bütün dövlət işçilərinə deyil, parlament binasında çalışan təxminən 500 nəfərə şamil ediləcək.

Parlament xidmətlərinin rəhbəri Rafael Qonzales-Montero qərarın hökumətin kibertəhlükəsizlik üzrə ekspertlərinin məsləhəti ilə verildiyini izah edib.

Yeni Zelandiyanın Baş naziri Kris Hipkins isə jurnalistlərə telefonunda “TikTok olmadığını” söyləyərək, "Mən o qədər də müasir və dəblə ayaqlaşan deyiləm", - deyə qeyd edib.

Lalə
Sfera.az