Neft kəskin ucuzlaşıb - Səbəbi nədir?
ABŞ-də 3 bankın müflis olması və ardınca Avropanın qiymətli kağızlar bazarında ucuzlaşmanın qeydə alınması əmtəə bazarlarında tələbi zəiflədib. Nəticədə əsas əmtəə hesab olunan neft qiymətlərində nəzərəçarpan azalma qeydə alınıb.
Sfera.az xatırladır ki, ABŞ-də bankların müflis olması ötən həftə baş verib və son həftə ərzində ölkədə digər bankların səhmləri ucuzlaşıb.
Dövlət qurumları bu neqativ prosesin digər banklara sirayət etməyəcəyini proqnozlaşdırsa da, baş verənlər bu ehtimalların özünü doğrultmadığını göstərir.
Qərb ekspertləri iqtisadi baxımdan vəziyyətin ağır olmadığını, amma təlaş səbəbindən depozit sahiblərinin və investorların öz vəsaitlərini banklardan kütləvi şəkildə geri çəkə biləcəklərini qeyd edirlər. Məhz təlaş ABŞ, Avropa və digər əlaqəli bazarlarda ağır böhran əlamətləri yarada bilər. Maliyyə bazarlarında tarazlığın pozulması isə əmtəə bazarlarında da sabitliyi pozacaq.
Sadalanan risklər əmtəə bazarlarının “aktyorlarını” qorxuya saldığından neft ucuzlaşmağa başlayıb. Son bir həftə ərzində “Brent” neftinin qiyməti 83 dollardan 72 dollara qədər enib. Qısa müddətdə neftin 13 faiz dəyər itirməsi iqtisadi səbəblərlə izah edilə bilməz, bu, daha çox təlaşın əlamətidir.
Son bir həftədə Azərbaycanın ixrac etdiyi “Azeri Light” markalı neft də dəyər itirib. Bir neçə gün ərzində “Azeri Light”ın qiyməti 85 dollardan 74,4 dollara geriləyib.
Xatırladaq ki, 2008-ci ildə maliyyə bazarlarında baş verən böhran qısa müddət sonra əmtəə bazarlarına keçmişdi. Həmin dövrdə neft qiymətləri 130-140 dollardan 40-50 dollara qədər düşdü. İndi hamını qorxudan 2008-ci ildəki böhranın yenidən təkrarlanmasıdır.
Vasif