Böyük Britaniya iki postsovet ölkəsini Rusiyadan qorumaq üçün hərəkətə keçdi

Böyük Britaniya Moldova və Gürcüstana maliyyə yardımı edəcək.

Sfera.az “Sky News”a istinadən bildirir ki,  bu addım sözügedən ölkələri Rusiyanın müdaxiləsindən qorumaq üçün atılacaq. Məlumata görə, Böyük Britaniyanın xarici işlər naziri Ceyms Kleverli bölgəyə səfəri zamanı yeni yardım paketini elan edəcək.

Paketə Moldovada iqtisadi və idarəetmə islahatlarının dəstəklənməsi üçün əlavə 10 milyon funt sterlinq, həmçinin Gürcüstanda gələn il keçiriləcək seçkilərin təhlükəsizliyini gücləndirmək məqsədilə nəzərdə tutulan vəsait daxildir. Kreml isə regionda nəzarəti gücləndirmək məqsədilə hər iki ölkədə dezinformasiya və iğtişaşlar yaymağa çalışmaqda ittiham olunur.

Bölgəyə səfərindən öncə Ceyms Kleverli fikirlərini bu cür ifadə edib: “Rusiyanın qəbuledilməz fəaliyyətlərinin gizli taktikalarını Moldova və Gürcüstandan daha yaxşı anlamaq lazımdır. Moskva onların demokratiyası, suverenliyi və ərazi bütövlüyünü açıq-aşkar pozduğu halda Böyük Britaniya sakit dayanmayacaq. Biz bu ölkələrin Rusiyanın hibrid təhdidlərinə qarşı dayanıqlığını gücləndirməli, demokratik seçimlərini qorumalı və onları təhlükədən qorumalıyıq”.

Qeyd edək ki, sözügedən səfər Moskvanın  Moldovada dövlət çevrilişi etmək üçün xarici təxribatçılardan istifadə etməyi planlaşdırması ilə bağlı iddialardan sonra planlaşdırılıb. Rusiya Xarici İşlər Nazirliyi isə bu iddiaları “tamamilə əsassız” adlandırıb.  Xatırladaq ki, bazar günü Moldova polisi hökumət əleyhinə nümayişlər zamanı iğtişaşları qızışdırmaqda ittiham olunan 7 nəfəri həbs edib.

Günay Rəsulqızı