"Ermənistanın Kollektiv Təhlükəsizlik Müqaviləsi Təşkilatından (KTMT) çıxmaq planı yoxdur, lakin blok ölkədəki mövqelərini tərk edir, bundan narahatıq".

Sfera.az xəbər verir ki, bunu Ermənistanın Baş naziri Nikol Paşinyan mətbuat konfransında bildirib.

O, bəzi narahatlıqların əsassız olduğunu deyib:

"2022-ci ildə KTMT prezidenti mənə KTMT-nin Ermənistanın təşkilatdan çıxmasından narahat olduğunu dedi. Mən cavab verdim ki, bu narahatlıqlar əsassızdır, lakin Ermənistanın KTMT-nin Ermənistanı tərk etməsi ilə bağlı narahatlığı haqlıdır. Mənim qiymətləndirməm belədir. KTMT-nin bilərəkdən və ya bilməyərəkdən Ermənistanı tərk etməsi bizi narahat edir”, - o vurğulayıb.

Paşinyan əlavə edib ki, Ermənistan bu addımın ölkənin təhlükəsizliyini gücləndirəcəyinə əmin olduqdan sonra öz nümayəndəsini KTMT baş katibinin müavini təyin etməyə razılaşacaq. O qeyd edib ki, Ermənistan KTMT ilə ardıcıl fəaliyyətini davam etdirir.

Xatırladaq ki, Ermənistanın Böyük Britaniyadakı səfiri Varujan Nersesyan yanvarın 20-də “Times” radiosuna müsahibəsində bildirib ki, İrəvan Rusiyanın Azərbaycanın hərəkətlərinə reaksiyasından razı deyil, çünki Moskvadan KTMT çərçivəsində konkret yardım tədbirləri gözləyirdi. Bununla belə, o əlavə edib ki, Ermənistan Rusiya sülhməramlılarının Dağlıq Qarabağdakı fəaliyyətini yüksək qiymətləndirir. Paşinyan yanvarın 10-da bəyan edib ki, Ermənistanın hazırkı şərtlərlə 2023-cü ildə KTMT-nin hər hansı təlimlərinə ev sahibliyi etmək planı yoxdur. Rusiya Xarici İşlər Nazirliyi isə bəyan etmişdi ki, İrəvan KTMT missiyası üzərində işi məntiqi sonuna çatdıra bilməyərək Avropa İttifaqına üstünlük verib.

Əzizə