ABŞ və Kanada rəsmiləri ötən gün Rusiyanın Ukraynaya qarşı hərbi təcavüzünü dəstəkləmək iddiası ilə sanksiyalar hədəfində olan qurumların siyahısına iki Kanada şirkəti də daxil edildiyini açıqlayıb.
 

Sanksiya siyahısına Monrealda qeydiyyatdan keçmiş “Cpunto Inc” və “Electronic Network Inc” şirkətləri daxil edilib.
 

Sfera.az bildirir ki, ABŞ Ticarət Departamentinin məlumatına görə, bu iki elektronika idxalçısı “Birləşmiş Ştatların milli təhlükəsizlik və ya xarici siyasətinin maraqlarına zidd hərəkətlər" siyahısına alınıb və ABŞ-ın sanksiya məhdudiyyətlərinə məruz qalıb.
 

Ötən həftə ABŞ hökuməti şirkətləri Moskvanın Ukraynaya müdaxiləsindən sonra Rusiya ilə bağlı tətbiq edilən sanksiyalara əməl etməyə çağırıb və xəbərdarlıq edib ki, bunu etməmək təqib və ya icra tədbirləri ilə nəticələnə bilər.
 

Qeyd edək ki, ABŞ Ticarət Departamenti bu yaxınlarda Rusiya və üçüncü ölkələrdən olan 90-a yaxın şirkətə ixrac məhdudiyyəti qoyub və onlara yarımkeçiricilər kimi malların alınmasını qadağan edib.
 

Kanadanın Sərhəd Xidmətləri Agentliyi bildirib ki, sanksiya tətbiq olunan iki şirkət Rusiyaya dəstəkdə qlobal səyin bir hissəsi kimi müəyyən edilib. Hal-hazırda isə rəsmi Ottava Rusiyanın texnologiyaya çıxışını məhdudlaşdırmaq üçün ABŞ Sənaye və Təhlükəsizlik Bürosu ilə işləyir.
 

Ticarət Nazirliyinin siyahısında hər iki şirkətin Rusiyaya konkret nə göndərdiyi və ya göndərməyə çalışdığı qeyd olunmayıb.
 

“Cpunto”nun direktoru Alexander Ermukov mətbuata açıqlamasında bildirib ki, onun firması məsələyə çox ciddi yanaşır.
 

“Biz həmişə vicdanla hərəkət etmişik, aldatmaq və ya hər hansı bir şəkildə pis hərəkət etmək niyyəti olmadan”. O əlavə edib ki, şirkət narahatlıqların aradan qaldırılması üzərində işləməyə davam etmək niyyətindədir, lakin hələlik heç bir detalı şərh edə bilməz.

Hər iki şirkətin nümayəndələri məsələ ilə bağlı hələlik açıqlama verməyiblər.

Aynil
Sfera.az