Texnologiya nəhəngi “TikTok” yeniyetmə istifadəçilər üçün yeni təhlükəsizlik tədbirləri elan edib.

Sfera.az bildirir ki, sözügedən addım gəncləri qorumaq üçün artan çağırışlarla bağlıdır. Məlumata görə, dəyişikliklər yeniyetmələrin ekran vaxtlarını məhdudlaşdırmaq və “TikTok”da keçirdikləri vaxtı tənzimləmək istiqamətində daha məqsədyönlü olmaq üçün nəzərdə tutulub.

“İnanırıq ki, rəqəmsal təcrübələr insanların özlərini ifadə etmələrində, ideyaları kəşf etmələrində və əlaqə saxlamalarında müsbət rol oynamalıdır”, -  “TikTok”un əməkdaşı Cormac Kinan bildirib.

Ekspertlər deyiblər ki, son iyirmi ildə sosial medianın inkişafı gənclər arasında psixi sağlamlıq böhranına səbəb olub. Mütəxəssislərin sözlərinə görə, buna görə də depressiya nisbətləri artır. Tədqiqatlar həmçinin göstərib ki, ekran vaxtının məhdudlaşdırılması gənclərin özlərini daha yaxşı hiss etməsinə səbəb ola bilər. 18 yaşdan kiçik “TikTok” istifadəçiləri indi avtomatik olaraq gündəlik 60 dəqiqə ekran vaxtı limitinə sahib olacaqlar:

“13 yaşdan kiçik istifadəçilərin də gündəlik 60 dəqiqə limiti olacaq. Valideyn və ya qəyyumlar onların gündəlik istifadə müddətini daha yarım saat uzadan parol daxil edə bilərlər”.

“TikTok” həmçinin, hər yeniyetmə hesabına ekran vaxtının həftəlik xülasəsini göndərəcək və proqrama 100 dəqiqədən çox vaxt sərf edən yeniyetmə istifadəçiləri gündəlik limit təyin etməyə sövq edəcək. Şirkət akademik araşdırmalar və Boston Uşaq Xəstəxanasında Rəqəmsal Sağlamlıq Laboratoriyasının mütəxəssisləri ilə məsləhətləşdikdən sonra 60 dəqiqəlik defolt limitinə qərar verdiyini vurğulayıb.

“Wellesley” Qadın Mərkəzlərinin böyük tədqiqatçısı Linda Çarmaraman sözügedən məhdudiyyətləri yaxşı addım adlandırıb. Lakin o deyib ki, bəzi gənclər təhlükəsizlik tədbirlərindən yayınmaq üçün yaşları haqqında yalan danışa bilərlər. “Bəzi insanlar sosial mediadan 15 dəqiqə istifadə etsə də, baxdıqlarından travma keçirə bilərlər. Yəni sosial mediada etdikləriniz buna nə qədər vaxt sərf etdiyinizdən daha vacibdir”.

Türkan