Çin də “Ukrayna bataqlığına” çəkilir? - “Bu baş verərsə...”
![Çin də “Ukrayna bataqlığına” çəkilir? - “Bu baş verərsə...”](https://sfera.az/photo/orginal/2023/03/01/1677665283_cin-ve-rusiya.jpg)
ABŞ Dövlət Departamentinin sözçüsü Ned Prays Rusiyaya ölümcül silahların verilməsi iddiası ilə bağlı Çinə xəbərdarlıq edib. O, qeyd edib ki, Çin bunu edəcəyi təqdirdə cavab verməli olacaq.
Daha əvvəl müxtəlif mənbələr, o cümlədən Mərkəzi Kəşfiyyat İdarəsinin direktoru Uilyam Börns rəsmi Pekinin Ukraynada istifadə olunması üçün Rusiyaya ölümcül silahların verilməsini nəzərdən keçirdiyini iddia etmişdi.
Bununla bağlı Sfera.az-a açıqlama verən siyasi şərhçi Kənan Novruzov deyib ki, İranın Rusiyaya tədarük etdiyi “Şahed” PUA-ları tükənir və Moskvanın Pekinin timsalında özünə alternativ axtarması mümkündür:
“Yəqin ki, yaıxn gələcəkdə tərəflər arasında əlaqə daha da güclənəcək. Hazırda Qərbin üç əsas rəqibi var - Rusiya, İran və Çin. Bu dövlətlərdən ilk ikisi ilə bağlı “düymə artıq basılıb”. Məlum olduğu kimi, Rusiya Ukraynada “bataqlığa çəkilib”. İran isə daxildəki aksiyalar fonunda “silkələnir”. Eyni zamanda Rusiyaya tədarük edilən “Şahed”lərlə əlaqədər Tehrana sərt sanksiyalar tətbiq olunur. İndi növbə, yəqin ki, Çindədir. Əlbəttə, Pekin Qərb üçün Moiskva və Tehrana nisbətən daha ciddi rəqibdir. Buna baxmayaraq, tərəflər arasında münasibət yaxın gələcəkdə daha da gərginləşəcək”.
Müsahibimiz bildirib ki, qarşıdakı həftələrdə Qərb mediasının Çinin Rusiyaya silahlar verməsi barədə məlumatları tirajlaması və Pekinə təzyiq göstərməsi mümkündür:
“Əslində Çin-Rusiya əməkdaşlığı Qərbə sərf edir. ABŞ və müttəfiqləri bundan istifadə edərək Çini sıxışdıracaqlar. Gələcəkdə Çin və Rusiya arasında hərbi əməkdaşlığın güclənməsi gözləniləndir. Bu baş verərsə, Ukraynadakı müharibənin miqyası böyüyəcək. Savaş regional yox, qlobal səciyyə daşıyacaq”.
Günay Rəsulqızı