Azərbaycanda bu məhsullar BAHALAŞIB - RƏQƏMLƏR

Azərbaycanda kənd təsərrüfatı məhsullarının istehsal xərclərində yüksək artım davam edir. 

Sfera.az xəbər verir ki, 2023-cü ilin yanvarında 2022-ci ilin dekabrı ilə müqayisədə kənd təsərrüfatı məhsullarının istehsalçı qiymət indeksi 2,9 faiz, o cümlədən bitkiçilik məhsulları üzrə 3,9 faiz, heyvandarlıq məhsulları üzrə 2 faiz yüksəlib. 

Qeyd edək ki, burada istehsalçı qiymət indeksi anlayışı istehsalçılar tərəfindən təklif edilən malların dəyərindəki dəyişikliyi göstərir. İstehsalçılarda qiymətlərin artması və ya azalması dolayısı ilə məhsulun istehsal xərclərindəki, yəni maya dəyərindəki dəyişikliyi ifadə edir. 

Rəsmi məlumatlara əsasən, aylıq müqayisə ilə yanaşı illik müqayisədə də kənd təsərrüfatı mallarının istehsalçı qiyməti artıb. İllik müqayisədə artım 11 faiz (heyvandarlıq məhsullarında 12 faiz, bitkiçilikdə 9 faiz) olub və digər məhsul qruplarından xeyli fərqlənib.

Müqayisə üçün bildirək ki, il ərzində qeyri neft-qaz sənaye məhsullarında istehsal xərcləri 7,8 faiz, tikintidə 2,9 faiz artıb. 

Kənd təsərrüfatı məhsullarının istehsal qiymətlərinin kəskin yüksəlməsi pərakəndə bazarda kənd təsərrüfatı mallarının istehlak qiymətlərinin artmasına ciddi təsir edir. Məhz bu səbəbdən hələ də kənd təsərrüfatı məhsullarında qiymət artımları yüksəkdir. Məsələn, bu ilin yanvarında ötən ilin yanvarına nisbətən tərəvəzlər 40 faiz, meyvələr 12 faiz, ət 15 faiz, balıq və balıq məhsulları 11 faiz, süd 11 faiz bahalaşıb. 

İstehsalçı qiymət artımlarının yüksək olması ondan xəbər verir ki, bazarlarda kənd təsərrüfatı mallarında güclü bahalaşma hələ davam edəcək. 

Vasif