Rusiya işğal etdiyi Krımdan vətəndaşların təxliyəsinə başlayıb.

Sfera.az bildirir ki, bu barədə Ukrayna Silahlı Qüvvələrinin Baş Qərargahı məlumat yayıb.  Qeyd olunub ki, Rusiya Silahlı Qüvvələrinin müvəqqəti işğal olunmuş Krımda olan hərbçiləri Ukraynanın əks-hücum əməliyyatı barədə xəbərlər fonunda panikaya düşüblər. 

“Xüsusilə də işğalçıların bu cür hərəkətləri Simferopol rayonunun Perevalnoye kəndində qeydə alınıb. Bu yaxınlarda Rusiyanın həmin ərazidə yerləşdirilən hərbi qulluqçuları ailələrini Rusiyadakı evlərinə yola salmağa başlayıblar”, - deyə məlumatda bildirilib.

Bundan əvvəl Ukrayna Silahlı Qüvvələrinin Baş Qərargahı bəyan edib ki, Krımdakı işğalçılar əks-hücum əməliyyatından qorxduqlarına görə müdafiəni gücləndiriblər.

“Donbasdakı işğalçılar da təlaş içindədirlər: Donetsk vilayətinin Qorlovka şəhərinin “şəhər prokuroru” bu yaxınlarda Rusiya Federasiyasına qaçmağa hazırlaşaraq tələsik istefa verib”, - bildirilib.

Xatırladaq ki, martın 1-nə keçən gecə Krımda partlayış səsləri eşidilib. Evpatoriya, Sakov və Çernomorski sakinləri pəncərələrin titrədiyini deyiblər. Rusiya isə bu barədə heç bir şərh verməyib.

Günay Rəsulqızı