Avropa İttifaqından Rusiya və İrana AĞIR ZƏRBƏ
Avropa İttifaqı (Aİ) Rusiyaya qarşı yeni ticarət sanksiyasını təsdiqləyib.
Sfera.az “Bloomberg”ə istinadən xəbər verir ki, bununla bağlı məlumat Aİ-yə sədrlik edən İsveçin rəsmi qurumunun sosial media hesabından paylaşılıb.
Məlumata əsasən, Rusiyaya qarşı yeni ticarət qadağaları, həm mülki, həm də hərbi məqsədlər üçün istifadə oluna bilən məhsul və texnologiyalara ixrac nəzarəti, eyni zamanda pilotsuz uçuş aparatları (PUA) göndərənlərə əlavə məhdudiyyətləri nəzərdə tutan yeni sanksiyalar təsdiqlənib.
Qeyd edək ki, bu, Aİ-nin Rusiyaya qarşı 10-ci sanksiyalar paketidir.
Hələlik sanksiyaların bütün təfərrüatları paylaşılmayıb.
Yeni sanksiyalar paketinə Rusiyaya 11 milyard avrodan çox dəyəri olan ixrac qadağası daxildir. Sanksiyaya əsasən, Rusiya Aİ ölkələrindən elektronika, xüsusi nəqliyyat vasitələri, maşın və mühərrik hissələri, yük maşınları və reaktiv mühərriklər üçün ehtiyat hissələri kimi məhsulları ala bilməyəcək. Bundan başqa Rusiyanın silah sistemlərində, o cümlədən PUA, raket və helikopterlərdə istifadə oluna bilən yeni elektron komponentlər və termal kameralar da məhdudiyyətlərə daxildir.
Məlumata əsasən, Rusiyaya PUA satan ölkələrə də eyni növ məhsulların ixracı qadağan ediləcək. Buna uyğun olaraq İran da Rusiyaya PUA satdığından sanksiyalara məruz qalacaq.
Vasif
