ABŞ prezidenti Co Baydenin Kiyevə gözlənilməz səfərinin əks-sədası hələ də davam edir.

Sfera.az bildirir ki, Qərb mediası “gizli səfərin” pərdəarxasından yazaraq prezidentin böyük qumar oynadığını iddia edib. Britaniyanın “Daily Mail” qəzeti səfərin son ana qədər gizli saxlanıldığını, əməliyyatın arxasında hesablanmış planlamanın olduğunu yazıb. 

“CNN İnternational” isə bildirib ki, Baydenin yanında kiçik bir qrup məsləhətçi, müxbir və fotoqraf olub: “Dünən saat 4:15-də prezident təyyarəsi “Air Force One” əvəzinə,  “Air Force C-32” ilə Vaşinqtondan gizli şəkildə ayrılıb”.

“BBC” iddia edib ki, təyyarədə olan jurnalistlər məxfiliyə təminat verib və onların mobil telefonları götürülüb.

Məlumata görə, təyyarə Polşaya getməzdən əvvəl Almaniyadakı ABŞ bazasında yanacaq doldurub. Polşadan Ukraynaya dəmir yolu ilə gedən Baydenin səfəri 10 saat çəkib. Qatardan düşəndən sonra Bayden xüsusi karvanla Ukrayna lideri Zelenskinin yanına gedib.

“The New York Times” qəzetinin məlumatına görə, Prezidenti qorumaq üçün yanında məxfi xidmət agentləri olmasına baxmayaraq, anonim qatarla səyahət “böyük qumar”dır:  “Bu, Moskvaya meydan oxumaqdır”.

“Dailymail” qəzeti həmçinin qeyd edib ki, Bayden aylardır Kiyevə getmək istəyirdi və son qərarı özü verib.

Baydenin səfərindən danışan və adının açıqlanmasını istəməyən yüksək səviyyəli bir məmurun sözlərinə görə, Bayden qatar səfərində yata bilməyib və bunun əvəzinə vaxtını nitqini hazırlamağa sərf edib.

Qeyd edək ki, Co Bayden Zelenski ilə görüşündə uzaqmənzilli silahların gündəmdə olduğunu bildirib və Ukraynaya veriləcək yeni yardım paketinin 500 milyon dollar dəyərində olduğunu vurğulayıb.

Günay Rəsulqızı