Zelenski Putinin onu öldürəcəyindən qorxaraq iki ay gizli bunkerdə yaşayıb.

Sfera.az bildirir ki, bu barədə “The Times” qəzeti məlumat yayıb. Qeyd olunub ki, Ukrayna prezidenti və yaxın ətrafı Rusiya ilə münaqişə başlayandan sonra bunkerdə planlaşdırılan iki həftə əvəzinə təxminən iki ay vaxt keçiriblər.

“2022-ci il fevralın 24-də Rusiya hərbi əməliyyatları başlayanda Ukrayna hökuməti dərhal Kiyevin mərkəzindəki Bankova küçəsində yerləşən təhlükəsizlik sığınacağına enib. Bunkerlə bağlı məxfilik o qədər yüksək idi ki, ölkə başçısını müşayiət edənlər “gizlilik sənədi” imzalamalı olublar. Onlara sığınacağın quruluşu, yeri, şəraiti və hətta yedikləri qidalar haqqında hər hansı təfərrüatları açıqlamaq qadağan edilib. Rus qoşunlarının Kiyevin kənarında yerləşməsi ilə Zelenskinin nazirləri və köməkçiləri üçün terror qorxusu dövrü başlayıb”.

Britaniya nəşri dövlət başçısı ilə birlikdə günəşi görməyən, hətta vaxtı belə bilməyən dövlət məmurlarının çətin həyatını poetik şəkildə təsvir edib: “Onlar davamlı olaraq  “iPhone”ları vasitəsilə müharibəni izlədiklərinə görə normal yata bilmirdilər. Bəzi ukraynalı məmurlar yeraltı bunkerdə yaşamaqdan yorulmuşdular. Hətta onlardan biri bir dəfə restoranda yemək üçün sığınacaqdan qaçdığını etiraf edib”.

“The Times” yazır ki, zaman- zaman bunkeri tərk edən yeganə şəxs Zelenski olub: “O, insanları Kiyevdən qaçmadığına inandırmaq üçün videomesajlar verməli və buna görə “yuxarıya” çıxmalı idi”.

Nəşr həmçinin İsrailin sabiq baş naziri Naftali Bennetin son açıqlamasını xatırladıb: “Bennet Moskvada danışıqlar zamanı Putindən Zelenskinin öldürülməyəcəyinə dair vəd aldığını iddia edib və Kremldən çıxan kimi Zelenskiyə zəng edib.

"İki saatdan sonra Ukrayna lideri Kiyevdəki ofisindən video yayımladı və gizlənmədiyini  və heç kimdən qorxmadığını dedi” - Bennet bildirib.

Zelenskinin gizləndiyi yerin ətrafında gəzən britaniyalı jurnalistin dərc olunan yazıda qeyd etdikləri isə diqqət çəkib: “Stolun üstündə dağ boyda ağ barıt, qadın paltarı, parik, bir tapança, küncdə xalça, bir banka benzin, çantada bir neçə ağ həb tapdım”.

Xatırladaq ki, “The Times” jurnalistinin baş çəkdiyi Zelenskinin Kiyevdəki yeraltı sığınacağı hələ sovet dövründə Ukraynanın ali rəhbərliyi üçün tikilib.

Günay Rəsulqızı