Ermənistanın sülhlə bağlı yeni təklifləri: Bakının cavabı nə olacaq? - ŞƏRH
Ötən gün Ermənistanın Baş naziri Nikol Paşinyan Azərbaycanla sülh müqaviləsinin mətni üzərində işin növbəti mərhələsinin yekunlaşdığını, təkliflərin artıq Bakıya, o cümlədən ATƏT-in Minsk qrupunun həmsədr ölkələrinə də təhvil verildiyini deyib.
Bununla bağlı Sfera.az-a açıqlama verən politoloq Məhəmməd Əsədullazadə bildirib ki, Paşinyan Azərbaycanla danışıqlarda irəliləyiş olduğunu da qeyd edib:
“Hazırda bu danışıqlar üçüncü tərəfin iştirakı olmadan Bakı və İrəvan arasında birbaşa reallaşır. Ermənistanın irəli sürdüyü təkliflərdə Qarabağa dair bənd yer alır. Bu bənd əsasən, təhlükəsizlik və hüquqi məsələləri əhatə edir. Ümumiyyətlə, Ermənistanın Qarabağla bağlı təklifləri qəbuledilməzdir və bu məsələ Azərbaycanın daxili işidir. Ermənistanın təklifləri və danışıqlarda irəliləyiş hər hansı bir prosesə müsbət təsir etməyəcək”.
Ekspert qeyd edib ki, Paşinyan vaxt qazanmağa çalışır və sülh müqaviləsinin bağlanmasına tələsmir: “Ermənistanın yeni təklifləri Azərbaycan tərəfindən qəbul edilməyə bilər. Son günlər Rusiya da prosesdə aktivlik nümayiş etdirir. Əsas məqsəd isə İrəvanla Bakı arasında birbaşa təmasın qarşısını almaqdır”.
Günay Rəsulqızı
