Rusiya yeni xarici siyasət doktrinasının təfərrüatlarını təqdim edib. 

Sfera.az bildirir ki, bu barədə Rusiya Xarici İşlər naziri Sergey Lavrov Dövlət Dumasında çıxışı zamanı məlumat verib.

O qeyd edib ki, bu, Qərbin hökmranlığına son qoymaq məqsədi daşıyır. “Beynəlxalq gündəm Qərbin şəxsi maraqları ilə deyil, BMT Nizamnaməsinin tələb etdiyi kimi ədalətli, universal maraqlar balansı ilə müəyyən edilməlidir.  Qərb birqütblü dünya nizamı arzusu ilə obsessiyaya qapılır və bununla da bu prinsipi kobud şəkildə pozur. ABŞ və onun müttəfiqləri yeni dünya mərkəzlərinin formalaşması və yüksəlişin obyektiv prosesinə müdaxilə etmək kimi manyak bir istəklə məşğuldurlar”.

Rusiya xarici işlər naziri kollektiv Qərbi müstəqil, milli yönümlü siyasət yürüdən dövlətləri cəzalandırmaq məqsədi daşımaqla, hərəkətlərində təhdid, şantaj və hətta açıq-aşkar oğurluq kimi qeyri-qanuni üsullardan istifadə etməklə ittiham edib.

Lavrovun fikrincə, Rusiyanın uzun müddətdir ki, cilovlanması Qərbin indiki siyasətinin tərkib hissəsidir: “Buraya NATO-nun Rusiya sərhədlərinə tərəf şərqə doğru genişlənməsi, həmçinin Ukraynanın rusofob hərbi dayağa çevrilməsi daxildir”.

Qeyd edək ki, daha əvvəl Sergey Lavrov Moskvanın Vaşinqtonla geosiyasi mübarizəyə cəlb olunduğunu bildirmişdi.

Günay Rəsulqızı