Ömürlük həbsə məhkum edildi, günahsız olduğu 28 il sonra üzə çıxdı – FOTO
ABŞ-da adam öldürməkdə təqsirli bilinərək ömürlük həbs cəzasına məhkum edilən şəxsin 28 ildən sonra günahsız olduğu anlaşılıb.
Sfera.az xarici mətbuata istinadən bildirir ki, ABŞ-ın Missuri ştatında 28 ildir həbsdə olan 50 yaşlı Lamar Consonun günahsız olduğu üzə çıxıb.
Qətlə görə ömürlük həbs cəzasına məhkum edilən Consonun cinayəti törətmədiyinə dair etibarlı sübutlar tapılıb.
Vəkilləri Consonun ailəsi ilə yenidən görüşməyi planlaşdırdığını və ondan oğurlanan vaxtı heç bir şeyin geri qaytara bilməyəcəyini açıqlayıblar.
Qeyd edək ki, vəkil Kim Qardner sübutlar tapıldıqdan sonra ötən ilin avqust ayında Consonun azadlığa buraxılması üçün müraciət edib. Conson 1994-cü ildə iki maskalı şəxs tərəfindən Markus Boydu güllələyərək öldürülməsi işində mühakimə olunub. Polis və prokurorlar qətlin narkotik satışı ilə bağlı mübahisə zəminində törədildiyini açıqlayıb. Conson isə cinayət anında hadisə yerindən kilometrlərlə uzaqda olan sevgilisinin yanında olduğunu bildirib.
Conson ömürlük həbs cəzasına məhkum edilərkən, hadisənin ikinci şübhəlisi Fil Kempbell isə günahını etiraf edərək cəzasını yüngülləşdirib və 7 il müddətinə azadlıqdan məhrum olunub. Başqa bir qətlə görə ömürlük həbs cəzası alan 46 yaşlı Ceyms Hovard isə ifadə verib ki, Boydu Kempbelllə birgə öldürüb, lakin Conson onların yanında olmayıb.
Lalə
Sfera.az
