2023-cü ilin yanvar ayında Rusiyanın dövlət büdcəsində böyük defisit (vəsait çatışmazlığı) yaranıb. 

Sfera.az “rbc.ru”ya istinadən xəbər verir ki, defisitin məbləği 1,76 trilyon rubl (təxminən 24 milyard dollar) olub. Yanvarda büdcədə böyük kəsirin yaranmasına səbəb neft və qaz gəlirlərinin 46 faiz azalması, eyni zamanda müharibə ilə əlaqədar xərclərin 59 faiz artması ilə bağlıdır. 

2023-cü ilin dövlət büdcəsində neft və qazdan vergi yolu ilə 9 trilyon rubl (123 milyard dollar) və ya hər ay orta hesabla 750 milyard rubl gəlir proqnozlaşdırılır. Yanvarda icra edilən büdcədə neft və qaz sektorundan vergi gəliri isə cəmi 425 milyard rubl olub. 

Rusiyanın neft və qazdan gəlirlərinin kəskin azalması qiymət tavanının tətbiq edilməsi ilə bağlıdır. Qərb ekspertləri hesab edir ki, qarşıdakı aylarda mövcud və yeni tətbiq ediləcək sanksiyalar Rusiyanın iqtisadi, o cümlədən maliyyə vəziyyətini bir qədər də ağırlaşdıracaq. 

Vasif